აშშ-ში მყოფი იუსტიციის მინისტრი თეა წულუკიანი ევროსაბჭოს მიღებულ რეზოლუციაში ყოფილი თავდაცვის მინისტრის ბაჩო ახალაიასთან დაკავშირებით არსებულ ჩანაწერს ეხმიანება და აცხადებს, რომ იგი აბსოლუტურად კანონიერად იმყოფება წინასწარ პატიმრობაში და იმ ციხეში სადაც ის ამჟამად არის.
,, ამჟამად ბაჩო ახალაია იმყოფება წინასწარ პატიმრობაში ივნისის თვიდან სერგო თეთრაძის საქმეზე, ხოლო ივნისიდან დღემდე არ არის ცხრათვიანი ვადა გასული და მთელი პასუხისმგებლობით შემიძლია განვაცხადო, რომ არც ერთ მიმდინარე საქმეზე ბაჩო ახალაიას წინააღმდეგ კონსტიტუციური ცხრათვიანი ვადა დარღვეული არ არის, რადგან ჩვენი კანონი ამ ვადის ყოველ ახალ საქმეზე თავიდან ათვლას ითვალისწინებს, Aამიტომ კანონი დაცულია. ევროსაბჭოში თუ ჩვენი მეგობარი ქვეყნის წარმომადგენელი პარალამენტარები თვლიან, რომ თვითონ კანონი არის უხარისხო და შესაცვლელია იუსტიციის სამინისტრო მზად არის შეცვალოს ეს კანონი, მაგრამ დღეს ჩვენი კანონი არა არის დარღვეული და ბაჩო ახალაია აბსოლუტურად კანონიერად იმყოფება წინასწარ პატიმრობაში და იმ ციხეში სადაც ის ამჟამად არის", -აცხადებს წულუკიანი.
შეგახსენებთ, რომ 103 მომხრე, 27 წინააღმდეგი - ევროსაბჭომ საქართველოს შესახებ რეზოლუცია მიიღო. მასში დარჩა ჩანაწერი, რომელიც ყოფილ მაღალჩინოსნებს, მათ შორის ბაჩო ახალაიას პატიმრობის ვადას და მისთვის წინასწარი პატიმრობის შეცვლას, ასევე მიხეილ სააკაშვილისა და მისი ოჯახის წევრების ქონების დაყადაღებას ეხება.
