ახალი ხელისუფლების მოსვლიდან ორი წლის განმავლობაში საქართველოს კონფლიქტური რეგიონების მიმართებაში სახელმწიფო პოლიტიკა ნულს უტოლდება, - ამის შესახებ „ჯი-ეიჩ-ენთან" საუბრისას პოლიტიკური გაერთიანება „ევროპელი დემოკრატების" ლიდერმა პაატა დავითაიამ განაცხადა. მისი თქმით, გაკეთდა მხოლოდ ის, რომ შერიგებისა და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა მოახერხა და აფხაზურ საზოგადოებაში ზედმეტსახელი „პაატა მატყუარა" („Паата плут") დაიმკვიდრა, რომლითაც მას აფხაზური პრესა დღეს მოიხსენებს.
„როდესაც ჩვენ კონფლიქტებზე ვსაუბრობთ, თქვენს სააგენტოსთან ბოდიში, მაგრამ ირონიით უნდა ვილაპარაკო, იმიტომ, რომ სხვა ნაბიჯები მე არამგონია გადადგმულიყო ან ჩვენ ვერ ვხედავთ ამ ნაბიჯებს. ირონია იმაში მდგომარეობს, რომ ორი წლის განმავლობაში ჩვენ გვყავს აფხაზეთის ლეგიტიმური მთავრობის მოვალეობის შემსრულებელი, რომელიც კომუნისტური პარტიის რაიკომის პირველი მდივანი იყო და ახალმა მთავრობამ ისიც კი ვერ მოახერხა, რომ მთავრობის თავმჯდომარე აერჩიათ ლეგიტიმური მთავრობისა. ორი წელი მოვალეობის შესრულება სასაცილო მდგომარეობაა. ჩვენ მივიღეთ ის, რომ ხდება საოკუპაციო ხაზების გადმოწევა და მავთულხლართების გავლება გრძელდება და საქართველოს მხრიდან ამას არავითარი რეაგირება არ მოჰყვება. ჩვენ მივიღეთ ის, რომ ამ ორი წლის განმავლობაში გამოჩნდა პაატა ზაქარეიშვილი ტყუილები და აფხაზეთში მას უკვე აქვს ზედმეტსახელი, რომლითაც მას აფხაზურ პრესაში მოიხსენებენ. ეს ზედმეტსახელია - „პაატა პლუტ" ანუ „პაატა მატყუარა". ამ ორი წლის განმავლობაში ჩვენ მივიღეთ ის, რომ მთავრობა აპირებს შეცვალოს და ასე ვთქვათ არბილებს „ოკუპაციის შესახებ კანონს"", - აცხადებს "ჯი-ეიჩ-ენთან" საუბარში დავითაია და აღნიშნავს, რომ ამ პერიოდში რუსეთმა მოახერხა და აფხაზეთის ე.წ. პრეზიდენტად რუსეთის ფედერალური უსაფროების სამსახურის აგენტი, პოლკოვნიკი ხაჯიმბა დასვა. მისივე შეფასებით, საქართველომ მიიღო ის, რომ საზღვარი ფსოუზე იხსნება და რეალურად ასოცირების ხელშეკრულებას აწერს რუსეთთან აფხაზეთი ხელს, ხდება მათი თავდაცვის სამინისტროების გაერთიანება.
"ჩვენ მივიღეთ ის, რომ აფხაზეთსა და ცხინვალის რეგიონში ახლა დგას გარდამავალი პერიოდი, იმასთან დაკავშირებით, რომ ეს ორი რეგიონი რუსეთის ფედერაციის სუბიექტები გახდდეს. ჩვენ მივიღეთ ის, რომ ერთხელაც საქართველოს პარლამენტს განცხადებაც კი არ მიუღიათ ოკუპირებულ ტერიტორიებთან დაკავშირებით. ჩვენ მივიღეთ ის, რომ თურქეთში ჩატარდა აფხაზეთის ე.წ. საპრეზიდენტო არჩევნები. ჩვენ მივიღეთ ის, რომ ამ პერიოდში ოკუპირებული ტერიტორიებთან დაკავშირებით არც ერთი დადებითი კონტექსტით არ იყო თქმული არაფერი ევროსაბჭოს საპარლამენტო ასამბლეადან დაწყებული და დამთავრებული ევროპარლამენტით. არ იყო გაკრიტიკებული არც რუსეთის აგრესია", - ამბობს დავითაია და ხაზგასმით აღნიშნავს, რომ საქართველომ მიიღო ის, რომ არც ერთ საერთაშორისო ფორუმზე არ ხდება მოხსენება იმ პრობლემის, რომლის წინაშეც საქართველო დგას. "ყველგან საუბარია მხოლოდ და მხოლოდ უკრაინაზე. მივიწყებულია საქართველოს საკითხი, იმიტომ არ ხდება მისი აქტიურად წინ წამოწევა საქართველოს მთავრობის მხრიდან".
"ამ ჩამონათვალის გაგრძელება უსასრულოდ შეიძლება",_ აცხადებს პაატა დავითაია და აღნიშნავს, რომ ეს არის რეალობა, რომელიც შექმნილია დღეს ოკუპირებულ ტერიტორიებთან მიმართებაში.
"მართლა, ძალიან მინდა, სულით და გულით ვთქვა რამე დადებითი, მაგრამ არა მარტო ამ მთავრობას არ გაუკეთებია არაფერი დადებითი კონფლიქტური რეგიონების საკითხთან მიმართებაში, არამედ 1993 წლიდან, როდესაც სოხუმი დაეცა და კიდევ უფრო ადრე, როდესაც ცხინვალი დაეცა ერთი მილიმეტრით ჩვენ წინ არ წავწეულვართ ჩვენს ტერიტორიებთან დაკავშირებულ არც ერთ საკითხში", - აცხადებს დავითაია და მინისტრ ზაქარეიშვილის ზედმეტსახელთა დაკავშირებით განმარტებას აკეთებს.
"„პაატა პლუტ" - ეს ზედმეტსახელი აფხაზურ პრესაში არის იმის გამო, რომ როდესაც ზაქარეიშვილი აკეთებს რაღაც განცხადებებს იმასთან დაკავშირებით, რომ აფხაზეთთან მიმართებაში რაღაც ხდება, ისინი დასცინიან და ამბობენ, რომ ზაქარეიშვილი ამას იგონებს და არანაირი მოლაპარაკება არ მიდის. აფხაზური მედია წერს, რომ ამას „პაატა პლუტი" აცხადებს.
ეს ჩემი მოგონილი ტერმინი არ არის , ეს ტერმინი აფხაზურ პრესაში გამოიყენება და ასეთი ფორმულირებით დღეს აფხაზი ჟურნალისტები წერენ. ბატონი ზაქარეიშვილი იღებს ამ გაზეთებს, მეც ვიღებ ინტერნეტის მეშვეობით. მე თუ ვღებულობ მასაც შეუძლია მიიღოს, რა თქმა უნდა. ამას საქართველოს მედიასაშუალებები არ ეცნობიან. ვინ კითხულობს ახლა აქ აფხაზურ გაზეთებს? მეტსაც ვიტყვი, აფხაზურმა მედიამ მოახერხა ის, რომ „ეფლის" პროგრამაში აიპადებში თქვენ შეგიძლიათ აფხაზურ ტელევიზიას უყუროთ და ამის გაპროტესტებაც კი არ ხდება. ასე რომ, ამ საშუალებების გამოყენებით, ვინც ამ თემითაა დაინტერესებული მისთვის ძალიან მარტივია გააანალიზოს საქართველოს მთავრობის ნებისმიერი ქმედება იქ", - აცხადებს დავითაია.