აჭარაში ინვესტიციების მოცულობა 24,2 %-ით გაიზარდა. აჭარის ფინანსთა და ეკონომიკის სამინისტროს ინფორმაციით, 2014 წლის ექვს თვეში აჭარაში 114,4 მლნ დოლარის კერძო პირდაპირი ინვესტიცია განხორციელდა. ეს იმ ფონზე, როდესაც 2013 წლის ანალოგირ პერიოდში რეგიონში სულ 92,1 მლნ დოლარის კერძო პირდაპირი ინვესტიციაა განხორციელებული, შესაბამისად ზრდამ 24,2 %-ი შეადგინა.
აჭარის ფინანსთა და ეკონომიკის სამინისტროში აცხადებენ, რომ 2014 წლის იანვარ-ივნისში განხორციელებული ინვესტიციებიდან, ყველაზე მეტი- 41,1 %-ი ტურიზმის სექტორშია განხორციელებული. როგორც ჩანს აჭარაში ტურიზმის შემდეგ ინვესტორებისთვის მიმზიდველი მშენებლობის სექტორია, სადაც 2014 წლის პირველნახევარში ინვესტიციების 38,5 %-ია ჩადებული. უწყების ინფორმაციითვე, 2014 წლის ექვს თვეში ინვესტიციების 14,5 %-ი ენერგეტიკის სექტორზე, სოფლის მეურნეობაზე - 1 %-ი, ხოლო მრეწველობაზე ინვესტიციების 0,5 %-ი მოდის. სტატისტიკური ინფორმაციის მიხედვით, ეკონომიკის სხვა სექტორებზე კი ინვესტიციების 4,4 %-ა მიმართული.