აზიის განვითარების ბანკისა (ADB) და ეკონომიკისა და მდგრადი განვითარების სამინისტროს ინიციატივით საქართველოში პირველი საერთაშორისო ფორუმი „საქართველო რეგიონალური ცენტრი და აზიის კარები ევროპაში" (Georgia - Regional Hub and Asia's Gateway to Europe) გაიმართება. ფორუმი საქართველოში თავს მოუყრის სახელისუფლებო და ბიზნესის 300 წამომადგენელს აზიის ქვეყნებიდან.
ფორუმი 29-30 ოქტომბერს „რადისონ ბლუ ივერიაში" გაიმართება, მსურველთათვის რეგისტრაციის ვადა 30 სექტემბერია.
ფორუმის ოფიციალურ ვებ-გვერდზე პრემიერ-მინისტრ ირაკლი ღარიბაშვილის მიმართვაა, სადაც განმარტებულია, რომ მიმინარე წლის ამბიციური და პროგრესული თემა „საქართველო რეგიონალური ცენტრი და აზიის კარები ევროპაში" ახალი ხედვების გაცვლის შესაძლებლობას აძლევს როგორც ხელისუფლების წარმომადგენლებს, ასევე ბიზნეს-ლიდერბსა და ექსპერტებს აზიის ქვეყნებიდან და მის ფარგლებს გარეთ.
„საქართველო ამაყობს, რომ არის სწრაფად განვითარებადი დემოკრატიული ქვეყანა, სადაც მსოფლიოში ერთ-ერთი ყველაზე მიმზიდველი ბიზნეს გარემო, ლიბერალური სავაჭრო რეჟიმი და დაბალი გადასახადებია. მას სტრატეგიული ადგილმდებარეობა გააჩნია და ქვეყნის ეკონომიკა ნამდვილად მრავალფეროვანია, უცხოური ინვესტიციებისთვის მიმზიდველია, შესანიშნავი პოტენციალი და კარგი ზრდის დინამიკა არსებობს ჰიდროენერგეტიკაში, წარმოებაში, ლოგისტიკისა და ტრანსპორტის, ასევე უძრავი ქონებისა და ტურიზმის სფეროებში", - განმარტებულია პრემიერის მისასალმებელ სიტყვაში.
ფორუმის ვებ-გვერდზე ასევე განთავსებულია აზიის განვითარების ბანკის ვიცე-პრეზიდენტის ვენაი ჟანგის მისასლმებელი სიტყვა, სადაც ნათქვამია, რომ ფორუმის მიზანია წარმოადგინოს საქართველო როგორც ევროპისა და აზიის გზაგასაყარზე არსებული ეკონომიკური ცენტრი. „ბოლო წლების განმავლობაში საქართველოს მთავრობამ განახორციელა მასშტაბური რეფორმები, რასაც შედეგად მოჰყვა ეკონომიკის დერეგულაცია, ბიუროკრატიული ბარიერებისა და კორუფციის მაჩვენებლის მნიშვნელოვანი შემცირება, ქვეყანაში მოქმედებს ლიბერალური სავაჭრო რეჟიმი და მნიშვნელოვანი წარმატებები გააჩნია Doing Business-ში. ევროკავშირთან მიღწეული ღრმა და ყოვლისმომცველი ვაჭრობის ხელშეკრულების გაფორმება ქვეყანას სრულად ახალ პერსპექტივას უქმნის", - ნათქვამია განცხადებაში.