ნატოს გენერალური მდივნის სპეციალური წარმომადგენლის სამხრეთ კავკასიისა და ცენტრალურ აზიის რეგიონში, ჯეიმს აპატურაის განცხადებით, ის, რაც 2008 წელს საქართველოში მოხდა, ბუქარესტის გადაწყვეტილებას უკავშირდებოდა. ამის შესახებ აპატურაიმ ტელეკომპანია "რუსთავი 2"-თან ინტერვიუში განაცხადა.
"უელსის სამიტის შემადგენელი ელემენტებიდან ერთ-ერთი იქნება თანამშრომლობის განმტკიცება. შეგიძლიათ, ამას უწოდოთ პაკეტიც. საქართველო უკვე ახორციელებს იმაზე მეტ თანამშრომლობას ნატო-სთან, ვიდრე სხვა რომელიმე პარტნიორი. ყველაზე მნიშვნელოვანი კი ის არის, რომ ვაპირებთ ვაღიაროთ თქვენი ქვეყნის წვლილი და პროგრესი, რომელსაც საქართველო ნატო-სკენ მიმავალ გზაზე ახორციელებს. რაც შეეხება რუსეთის ფაქტორს, მას საკუთარი განრიგი აქვს. ის, რაც 2008 წელს მოხდა, ნამდვილად უკავშირდებოდა ბუქარესტის გადაწყვეტილებას. ჩემი ზოგიერთი კოლეგა ამბობს, რომ თუ MAP-ს მივცემთ ან არ მივცემთ საქართველოს, რუსეთი საპასუხო რეაქციას ორივე შემთხვევაში განახორციელებს. მე კი არ ვიცი, რას იზამს რუსეთი. ჩვენ ყველა გადაწყვეტილებას მივიღებთ მხოლოდ საქართველოს პროგრესის გათვალისწინებით და ბუქარესტის გადაწყვეტილებების მიხედვით", - განაცხადა აპატურაიმ.
