ხვალ, 6 ივნისს, 19:00 საათზე, მწერალთა სახლში შორენა ლებანიძის ახალი წიგნის პრეზენტაცია გაიმართება. მხატვრულ-დოკუმენტური რომანი _ "საშვი კონფლიქტის ზონაში" _ გამომცემლობა "არტანუჯმა" გამოსცა. ნაწარმოებს ჟურნალისტური მოგონებები უდევს საფუძვლად. ავტორის მიერ აღწერილი ამბები მეოცე საუკუნის მიწურულის ერთწლიან მონაკვეთს მოიცავს _ აფხაზეთის ომის დაწყებიდან დასავლეთ საქართველოში გაჩაღებული სამოქალაქო დაპირისპირების შეწყვეტამდე.
ამ პერიოდში შორენა ლებანიძე პირველი ქართული დამოუკიდებელი გაზეთის, ყოველკვირეული "7 დღის" თანამშრომელი, სარედაქციო კოლეგიის წევრი და კორესპონდენტი იყო. მას, როგორც ცხელ წერტილებში საფრონტო რეპორტაჟების დასაწერად მივლინებულ ჟურნალისტს, ხშირად უწევდა მგზავრობა აფხაზეთისა და სამეგრელოსკენ, 1992 წელს გაცემული, დღეს კი წიგნის გარეკანზე აღბეჭდილი საშვით ხელში. ეს ძველი, მივიწყებული დოკუმენტი, რომანში ასახული მოვლენებიდან ოცი წლის შემდეგ, შორენა ლებანიძეს უკან მიხედვისა და ჩავლილი ამბების ახლებურად გააზრების ნებართვას აძლევს. ავტორს სურს, სულ სხვაგვარად დაინახოს მკვლელობებით, ღალატით, ხმაურითა და მძვინვარებით სავსე ქართული რეალობა, მოგვითხროს ადამიანებზე, რომლებმაც ეს რეალობა შექმნეს.
"საშვი კონფლიქტის ზონაში" შორენა ლებანიძის მესამე წიგნია. ორი წლის წინ დაიბეჭდა მისი მხატვრულ-დოკუმენტური რომანი "ეს მე ვარ _ ფიროსმანი", მანამდე კი დოკუმენტური მოთხრობა "მაესტროს დაბრუნება", რომელიც ქართველი დირიჟორის, ხელოვნების დამსახურებული მოღვაწის, ევგენი მიქელაძის ცხოვრებასა და შემოქმედებას მიეძღვნა.
