„ნაციონალური მოძრაობის" წევრის დავით დარჩიაშვილის შეფასებით პრემიერ-მინისტრი ნიშნის მოგებისა და სარკაზმის დაბალი ხარისხით გამოირჩევა.
აღნიშნულის შესახებ დარჩიაშვილმა „ჯი-ეიჩ-ენთან" საუბარში ირაკლი ღარიბაშვილის დღევანდელი განცხადებების შეფასებისას განაცხადა.
„არ ვიცი, ამაში იუმორს ხედავს თუ სარკაზმს თუ ორივეს ერთად. სადამდე უნდა იყოს პრემიერ-მინისტრი მდარე ხარისხის სარკაზმით დაკავებული, ჩემთვის გაუგებარია"- აღნიშნა მან.
რაც შეეხება ფაქტობრივ შედარებებს, რაც პრემიერ-მინისტრმა „ნაციონალური მოძრაობის" მიმართულებით თქვა, დარჩიაშვილის თქმით, სრულიად აცდენილი რეალობას.
„ღარიბაშვილის შედარებები ისევე აცდენილია რეალობას, როგორც ის, რომ თქვა, ყველაფერი შევასრულე, რასაც ხალხს დავპირდიო . ბიძინა ივანიშვილს თუ შეუსრულა დაპირება, იმას ხალხისადმი დაპირებულში ნუ აურევს. ვფიქრობ, პრემიერი ადეკვატურობას კარგავს ნელ-ნელა, რადგან ქვეყნის მმართველობა ძალიან მძიმეა და სრულიად გამოუცდელ ადამიანს რომ ჩააბარებ ამხელა თანამდებობას , გასაკვირიც არაფერია", -თქვა დარჩიაშვილმა და აღნიშნა, რომ მისთვის გაუგებარია ირაკლი ღარიბაშვილის განცხადება, რომ „ნაციონალური მოძრაობის" რეიტინგი 5% -მდეა დაცემული.
ირაკლი ღარიბაშვილის განცხადებით, " ნაციონალური მოძრაობის" რეიტინგი მთლიანობაში 5% -ს შეადგენს და " ნაციონალური მოძრაობის" კლებად რეიტინგს ბევრი ორგანიზაციის კვლევა ადასტურებს.
