ტელეკომპანია "რუსთავი 2-ის" მიერ ფარული სატელეფონო ჩანაწერების გამოქვეყნების გამო, მედიასაშუალების წინააღმდეგ ნებისმიერი სადამსჯელო ქმედების გატარებას არასამთავრობო სექტორი დაუშვებლად მიიჩნევს და სპეციალურ განცხადებას ავრცელებს.
ხელმომწერი ორგანიზაციები განმარტავენ, რომ "რუსთავი 2-ს" ამ შემთხვევაში იცავს „სიტყვისა და გამოხატვის თავისუფლების შესახებ" კანონი. მათივე განმარტებით, ტელეკომპანიის ქმედებები სრულ შესაბამისობაშია „მაუწყებელთა ქცევის კოდექსთან", რომელიც ადგენს, რომ ფარული მეთოდების გამოყენებით ინფორმაციის მოპოვება და გადაცემა გამართლებულია, როდესაც მოვლენა საზოგადოებრივი ინტერესის საგანია, არსებობს საფუძვლიანი ვარაუდი, რომ ახალი მტკიცებულებები იქნება მოპოვებული და ეს აუცილებელია პროგრამის სიზუსტის უზრუნველსაყოფად.
"იმ შემთხვევაში, თუ პროკურატურამ საგამოძიებო ქმედებები სწორედ "რუსთავი 2-ის" მიმართ დაიწყო, ეს შექმნის მედიის თავისუფლების შეზღუდვის შემაშფოთებელ პრეცედენტს", - ნათქვამია არასამთავრობო ორგანიზაციების განცხადებაში.