კულტურის მინისტრის ყოფილი მოადგილე, საყდრისის გადარჩენის კომიტეტის წევრი, მარინე მიზანდარი საყდრისის ირგვლივ მიმდინარე პროცესების გამჭვირვალობას მოითხოვს.
როგორც მარინე მიზანდარმა დღეს საყდრისის გადარჩენის კომიტეტის წევრებთან ერთად გამართულ დღევანდელ პრესკონფერენციაზე განაცხადა, ნაცვლად იმისა, რომ საქართველოში ჩამოსულიყო საერთაშორისო კომისია, კულტურული მემკვიდრეობის დაცვის სააგენტომ ორი ექსპერტი მოიწვია: ბულგარელი სამთო-გეოლოგი და გერმანელი სამთო არქეოლოგი.
მიზანდარის ინფორმაციით, უცხოელი ექსპერტები გუშინ, ყოველგვარი გამჭვირვალობის გარეშე, "მიჩუმათებულად" საყდრისი-ყაჩაღიანის ტერიტორიაზე იმყოფებოდნენ და ძეგლი ადგილზე დაათვალიერეს.
საყდრისის გადარჩენის კომიტეტი მოითხოვს, რომ უცხოელ ექსპერტებს მიეცეს პრესკონფერენციის გამართვის საშუალება, სადაც ისინი არსებული ინფორმაციის შესახებ ისაუბრებენ.
საყდრისის გადარჩენის კომიტეტის ინფორმაციით, ამ ეტაპზე ადგილზე მიყვანილია მძიმე ტექნიკა და დაზიანებულია ძეგლის დიდი ნაწილი.
"ეს სისხლის სამართლის საქმე გახლავთ; კერძო კომპანიამ დააზიანა, ჯერ კიდევ იანვრის თვეში მოარღვია, მთელი რიგი კულტურული ფენები, ძალიან მნიშვნელოვანი კლდეში ნაკვეთი აუზები, სანაყი მოედანი და ა. შ. დღესდღეობით განადგურების კიდევ უფრო დიდი საფრთხე ემუქრება საყდრისი-ყაჩაღიანის ბორცვს", - აღნიშნა მარინე მიზანდარმა.
მისი აზრით, არის მცდელობა, სახელმწიფო უწყებებიდან კულტურული მემკვიდრეობის დისკრედიტაციისა და განადგურებისთვის მიცემულია მწვანე შუქი.
