ქობულეთში მიწების დამშრობი სისტემების რეაბილიტაცია უახლოეს მომავალში განხორციელდება. ქობულეთის მუნიციპალიტეტის მიწების დამშრობი სისტემების რეაბილიტაციის ფარგლებში, 2500 ჰა სასოფლო-სამეურნეო მიწის ფართობზე მოხდება ჭარბი წყლების მოცილება. პროექტით დაგეგმილია 3 სატუმბი სადგურის აშენება, რომლის საშუალებითაც ჭარბი წყლები ინტენსიურად გაიყვანება ფართობებიდან და მილსადენის საშუალებით ჩაედინება ზღვაში. ასევე, ქობულეთის ცენტრალური მაგისტრალი და მოსახლეობა დატბორვისგან იქნება დაცული; არსებული ნაკრძალი დაცული იქნება დამბებით, რომლებიც დაიცავენ მას ზედაპირული წყლებისგან; დარეგულირდება მდ. ტოგონის და მდ. ოჩხამურის ნაპირები შესაბამისად, მიმდებარე სოფლები დატბორვისგან იქნება დაცული.
პროექტირება დასრულდება მიმდინარე წლის 30 მაისს, ხოლო სარეაბილიტაციო სამუშაოები პროექტის ექსპერტიზის ჩატარების შემდეგ, მიმდინარე წლის ივლისი-აგვისტოს თვეში დაიწყება და 2017 წელს დასრულდება. აღნიშნულ პროექტზე, უკრაინის საპროექტო ინსტიტუტის „უკრ ვოდპროექტისა" და „საქართველოს გაერთიანებული სამელიორაციო სისტემების კომპანიას" შორის გაფორმებული ურთიერთთანამშრომლობის ხელშეკრულების ფარგლებში, უკრაინელი სპეცალისტები მუშაობენ. სარეაბილიტაციო სამუშოების წინასწარი ღირებულებაა 11 მლნ 800 ათასი ლარი.
