საგარეო საქმეთა მინისტრი მაია ფანჯიკიძე გაეროს მიერ ოკუპირებული აფხაზეთისთვის დაფინანსების გამოყოფის შესახებ განმარტებას აკეთებს. როგორც მთავრობის სხდომის დაწყებამდე ფანჯიკიძემ საკითხის კომენტირებისას განმარტა გაერო ოკუპირებულ აფხაზეთის ტერიტორიაზე სხვადასხვა სახის პროექტებს ახორციელებს და ეს პირველი შემთხვევა არ არის.
,, გაერო აფხაზეთის ტერიტორიაზე ახორციელებს სხვადასხვა სახის პროექტებს და ეს პირველად არ ხდება. საქართველოს ცენტრალური ხელისუფლება ყოველთვის ინფორმირებულია ამ პროექტების შესახებ, რადგან ის საქართველოს ტერიტორიაზე ხორციელდება. ახლაც ზუსტად ასეთივე სიტუაციაა და სამწუხაროდ, არაერთხელ ყოფილა შემთხვევები, როდესაც დეფაქტო ხელისუფლების წარმომადგენლები ცდილობენ, რომ მსგავსი კონტაქტები, რომელიც აქვთ საქართველოს ცენტრალური ხელისუფლების გავლით წარმოაჩინონ როგორც დამოუკიდებელი კონტაქტები. შესაბამისად, ამ მხრივ, ეს არის ინფორმაცია. რაც შეეხება პროექტებს, ჩვენ ასეთი პროექტების განხორციელებას მივესალმებით", - განაცხადა მაია ფანჯიკიძემ.
შეგახსენებთ, რომ გაეროს განვითარების პროგრამების კოორიდინატორი ნილს სკოტი აფხაზ სეპარატისტთა ლიდერს ალექსანდრე ანქვებს შეხვდა და განაცხადა, რომ გაერო აფხაზეთში პროგრამების განხორციელებისათვის 15 მილიონი აშშ დოლარის დახარჯვას აპირებს. ინფორმაციას ამის შესახებ აფხაზური მედია ავრცელებს.
მათივე ინფორმაციით, ანქვაბთან შეხვედრისას სკოტმა აღნიშნა, რომ პროგრამების დაფინანსების თანხა შესაძლოა კიდევ გაიზარდოს, იმ შემთხვევაში თუ აფხაზეთის ხელისუფლება პირადად მიმართავს გაეროს დონორ-ქვეყნებს და მათ აფხაზეთში თანხის ჩადების აუცილებლობაში დაარწმუნებს.
აფხაზ სეპარატისტთა ლიდერმა გაეროს პროგრამის კოორდინატორს შეხვედრაზე რუსეთის თანხებით აღგენილი ობიექტების გახვა ურჩია და განაცხადა, რომ მოხარული იქნება თუ გაერო ასევე რეალურ კვალს დატოვებს აფხაზეთში.
