გიგი უგულავას და მასთან ერთად ბრალდებულების საქმეზე დასაკითხ მოწმეთა სიაში იუსტიციის ყოფილი მინისტრი ზურაბ ადეიშვილიც არის.
"თბილისის განვითარების ფონდთან" დაკავშირებული საქმის წინასასამართლო სხდომაზე, დაცვის მხარემ საკუთარ დასაკითხ მოწმეთა სიაში სწორედ ადეიშვილის გვარი დაასახელა და როგორც ადვოკატებმა განმარტეს, საქმეს დართული აქვს ადეიშვილის გამოკითხვის ოქმი. თუმცა, რა ფორმით მოხდება იუსტიციის ყოფილი მინისტრის უგულავას საქმეზე დაკითხვა, ადვოკატებს არ დაუკონკრეტებიათ.
როგორც გიგი უგულავას ერთ-ერთმა დამცველმა გიზო უგლავამ განაცხადა, იგი უნგრეთში იმყოფებოდა, სადაც გამოკითხა ზურაბ ადეიშვილი აღნიშნულ საქმესთან დაკავშირებით და გამოკითხვის ოქმი დადასტურებულია მისი და ადეიშვილის ხელმოწერით. პროცესის დასრულების შემდეგ გიზო უგლავამ არ დააკონკრეტა, რა კონკრეტული ფორმით მოხდება ადეიშვილის პროცესზე დაკითხვა, თუმცა აღნიშნა, რომ ეს კანონით გათვალისწინებული პროცედურის მიხედვით განხორციელდება. ამასთან, მან აღნიშნა, რომ ყოფილ მინისტრს ევროკავშირის ქვეყნებში პოლიტიკური დევნილის სტატუსი გააჩნია.
დასაკითხ მოწმეთა სიაში უგულავას მხარეს ასევე ჰყავს გიორგი ღვინიაშვილი, შოთა ხიზანიშვილი, შოთა უტიაშვილი, მამუკა ახვლედიანი, გიორგი საბანაძე და სხვები.
მასალის გამოყენების პირობები
