„უფლებადამცველთა გაერთიანებამ" საქართველოს მთავარ პროკურატურას წერილი გაუგზავნა, რომლითაც ზვიად გამსახურდიას გარდაცვალებასთან დაკავშირებული ძიების შესახებ ინფორმაციის მიღება მოითხოვა. როგორც გაერთიანების ხელმძღვანელი ნიკოლოზ მჟავანაძე განმარტავს, წერილში ხაზგასმული იყო, რომ საჭირო იყო 2011 წლის საპარლამენტო კომისიის დასკვნის მხედველობაში მიღება, რომელმაც ფაქტიურად დაადასტურა ის გარემოება, რომ საქმე არა თვითმკვლელობასთან, არამედ მკვლელობასთან გვქონდა.
,, რამდენიმე დღის წინ საქართველოს მთავარი პროკურატურიდან „უფლებადამცველთა გაერთიანებაში" შემოვიდა წერილი, სადაც აღნიშნულია, რომ გამოძიება მიმდინარეობს და რომ საპარლამენტო კომისიის დასკვნის დოკუმენტში აღნიშნული გარემოებები დაექვემდებარება საგამოძიებო მოქმედებებით გადამოწმებას. ეს იმას ნიშნავს, რომ ის ადამიანები, რომლებიც გამოიკითხნენ კომისიის მიერ ზვიად გამსახურდიას საქმესთან დაკავშირებით ოფიციალურად დაიკითხებიან მთავარ პროკურატურაში, სავარაუდოდ ასევე ჩატარდება საგამოძიებო ექსპერიმენტი. რამდენადაც გვაქვს ინფორმაცია ამ კუთხით უკვე დაწყებულია აქტიური მუშაობა და პრეზიდენტის დაცვის რამდენიმე წევრი და საქმესთან დაკავშირებული სხვა პირები უკვე დაიკითხენ და დაკითხვები დღესაც გრძელდება"- განაცხადა ,,უფლებადამცველთა გაერთიანების'' თავმჯდომარემ ნიკოლოზ მჟავანაძემ.
როგორც ცნობილია, რამდენიმე დღეში საქართველოში 31 მარტს პრეზიდენტ ზვიად გამსახურდიას 75 წლის იუბილეს აღნიშნავენ. მჟავანაძის განმარტებით, არ არის გამორიცხული ამ დღისთვის გარკვეული სიახლეები პროკურატურამ საზოგადოებას ამ საქმესთან დაკავშირებით ოფიციალურად მიაწოდოს.