უშიშროების საბჭოს მდივანი ირინა იმერლიშვილი რუსეთის მხრიდან საქართველოს საჰაერო სივრცის დარღვევას ეხმიანება და მას რუსეთის მხრიდან მორიგ პროვოკაციად აფასებს.
,, ერთმნიშვნელოვნად ეს არის რუსეთის მხრიდან პროვოკაცია. გუშინ საგარეო საქმეთა სამინისტრომ განცხადება გააკეთა, ეს განცხადება საქართველოს სახელით არის გაკეთებული, რომელსაც ჩვენ ვუერთდებით. მხოლოდ საერთაშორისო თანამეგობრობის ჩარევით, მათთან ერთად მუშაობით შეიძლება ასეთი თემების გადაწყვეტა, ვინაიდან ეს არის ყველა სუვერენული ქვეყნის კანონის დარღვევა", - განაცხადა იმერლიშვილმა
შეგახსენებთ, რომ გუშინ დაახლოებით 12.20 საათზე, ოკუპირებულ ცხინვალის რეგიონში უკანონოდ განლაგებული მი-8 ტიპის რუსული სამხედრო ვერტმფრენი შემოიჭრა საქართველოს ცენტრალური ხელისუფლების მიერ კონტროლირებად საჰაერო სივრცეში და გადაუფრინა გორისა და კასპის რაიონების სოფ. არბოს, მერეთის, დიცის, კოშკას, ქერეს, ფლავის, ფლავისმანის, ქვეშის, მეჯვრისხევის, ზერტის, კირბალის, ბერშუეთის, წითელუბნის, ხურვალეთის, ზადიაანთკარის, საკორინთლოს, ქვემო ჭალას, პანტიანისა და ვეკეს ტერიტორიაზე განლაგებულ საქართველოს შინაგან საქმეთა სამინისტროს საგუშაგოებსა და პოლიციის შენობებს.
გუშინვე, დაახლოებით 18:22 საათზე, ოკუპირებული აფხაზეთში უკანონოდ განლაგებულმა რუსული უპილოტო საფრენი აპარატი გალის რაიონის სოფ. ნაბაკევის მიმართულებიდან შემოიჭრა ცენტრალური ხელისუფლების მიერ კონტროლირებად საჰაერო სივრცეში და გადაუფრინა ზუგდიდის რაიონის სოფ. ხურჩაში განლაგებულ შინაგან საქმეთა სამინისტროს საგუშაგოებს.