რუსული სამხედრო ვერტმფრენის საქართველოს ცენტრალური ხელისუფლების მიერ კონტროლირებად საჰაერო სივრცეში შემოჭრას პრეზიდენტი გიორგი მარგველაშვილი სუვერენული ქვეყნის საჰაერო სივრცის დარღვევად აფასებს. როგორც საკითხის კომენტირებისას მარგველაშვილმა განმარტა აღნიშნულ ფაქტს ქართული მხარე კოორდინირებული მუშაობით უპასუხებს.
"ეს არ არის მხოლოდ ჩვენი საჰაერო სივრცის დარღვევა, არამედ ეს არის კონტროლირებადი საჰაერო სივრცის დარღვევა. რთული ვითარებაა რეგიონში და ჩვენ უაღრესად ფრთხილად უნდა ვიყოთ, რომ პროვოკაციას არ წამოვეგოთ. მათ ნაბიჯებს კოორდინირებული მუშაობით ვპასუხობთ და თვალყურს ვადევნებთ, როგორ ვითარდება მოვლენები რეგიონში და ჩვენს ქვეყანაში. ხაზგასმით მინდა, აღვნიშნო, რომ ეს არის პროვოკაცია და მინდა ვუთხრა რუსეთის მაღალი თანამდებობის პირებს, რომ ჩვენ ამ პროვოკაციას არ ავყვებით", - განაცხადა მარგველაშვილმა.
შეგახსენებთ, რომ გუშინ დაახლოებით 12.20 საათზე, ოკუპირებულ ცხინვალის რეგიონში უკანონოდ განლაგებული მი-8 ტიპის რუსული სამხედრო ვერტმფრენი შემოიჭრა საქართველოს ცენტრალური ხელისუფლების მიერ კონტროლირებად საჰაერო სივრცეში და გადაუფრინა გორისა და კასპის რაიონების სოფ. არბოს, მერეთის, დიცის, კოშკას, ქერეს, ფლავის, ფლავისმანის, ქვეშის, მეჯვრისხევის, ზერტის, კირბალის, ბერშუეთის, წითელუბნის, ხურვალეთის, ზადიაანთკარის, საკორინთლოს, ქვემო ჭალას, პანტიანისა და ვეკეს ტერიტორიაზე განლაგებულ საქართველოს შინაგან საქმეთა სამინისტროს საგუშაგოებსა და პოლიციის შენობებს.
გუშინვე, დაახლოებით 18:22 საათზე, ოკუპირებული აფხაზეთში უკანონოდ განლაგებულმა რუსული უპილოტო საფრენი აპარატი გალის რაიონის სოფ. ნაბაკევის მიმართულებიდან შემოიჭრა ცენტრალური ხელისუფლების მიერ კონტროლირებად საჰაერო სივრცეში და გადაუფრინა ზუგდიდის რაიონის სოფ. ხურჩაში განლაგებულ შინაგან საქმეთა სამინისტროს საგუშაგოებს.
