რუსეთის მხრიდან უკრაინის სუვერენიტეტის შემდგომი დარღვევა, გავლენას მოახდენს რუსეთის მდგომარეობაზე საერთაშორისო არენაზე და შესაძლოა, მისი იზოლაცია გამოიწვიოს. ამის შესახებ აშშ-ის პრეზიდენტმა ბარაკ ობამამ რუსეთის პრეზიდენტს ვლადიმერ პუტინს სატელეფონო საუბრისას განუცხადა.
პუტინისა და ობამას სატელეფონო საუბარი, რომელიც საათნახევარზე მეტი გაგრძელდა საკმაოდ დაძაბულად წარიმართა, იტყობინება დასავლეთის მედია.
ობამამ პუტინს განუცხადა, რომ უკრაინის ტერიტორიული მთლიანობის დარღვევა ნეგატიურად აისახება რუსეთის მდგომარეობაზე მსოფლიოში.
„უახლოესი საათების განმავლობაში აშშ დაუყონებლივ გამართავს კონსულტაციებს მოკავშირეებთან და პარტნიორებთან უშიშროების საბჭოში, ჩრდილოატლანტიკურ საბჭოში, ეუთოში, და ბუდაპეშტის მემორანდუმის ხელმომწერებთან", - ნათქვამია ორი ლიდერის სატელეფონო საუბრის შემდეგ გავრცელებულ ინფორმაციაში.
ამავე დროს, აშშ შეაჩერებს მონაწილეობას სოჭში გასამართ დიდი რვიანის მოსამზადებელ თათბირებში.
„რუსეთის მხრიდან საერთაშორისო სამართლის ნორმების დარღვევა დიდ პოლიტიკურ და ეკონომიკურ იზოლაციას გამოიწვევს", - აღნიშნულია განცხადებაში.
ობამამ პუტინს განუცხადა, რომ თუ რუსეთი შეწუხებულია უკრაინაში ეთნიკურ რუსებთან დამოკიდებულებით, ეს საკითხი უნდა გადაიჭრას უკრაინის ხელისუფლებათან თანამშრომლობით ან დამკვირებლების გაგზავნით გაეროს ან ეუთის ეგიდით. რუსეთს როგორც ორივე ორგანიზაციის წევრს შესაძლებლობა ექნება მონაწილეობა მიიღოს ამ პროცესში.
მასალის გამოყენების პირობები
