აშშ-ის კონგრესში საქართველოს მხარდამჭერი რეზოლუციის პროექტი შევიდა. კონგრესმენებმა ტედ პომ და უილიამ კიტინგმა წარმომადგენლობით პალატას და პრეზიდენტ ობამას მიმართეს, რომ სექტემბერში დიდ ბრიტანეთში დაგეგმილ ნატო-ს სამიტზე ამერიკამ საქართველოსთვის MAP-ის მინიჭებას მხარი რეზოლუციით დაუჭიროს.
პროექტის ტექსტში ნათქვამია, რომ წარმომადგენელთა პალატა მხარს უჭერს საქართველოს სწრაფვას ნატო-ში გაწევრიანებისადმი და ცნობს იმ სარგებელს, რომელიც ნატო-სა და საქართველოს პოლიტიკურ და ეკონომიკურ თანამშრომლობას მოაქვს.
ტექსტში ნათქვამია, რომ თანამშრომლობა ალიანსსა და საქართველოს შორის გამოიწვევს ეკონომიკურ ზრდას, დემოკრატიული ინსტიტუტების განვითარებას და კანონის უზენაესობის გამყარებას როგორც სამხრეთ კავკასიის რეგიონში, ასევე მთელ აღმოსავლეთ ევროპაში.
წარმომადგენელთა პალატა რუსეთის ხელისუფლებას მოუწოდებს, პატივი სცეს ქვეყნების უფლებას, გააკეთონ საკუთარი არჩევანი.
საგარეო პოლიტიკის პროექტში კონგრესმენები ნატო-ს წევრ ქვეყნებს ასევე სთხოვენ, რომ საქართველოს MAP-ი 2014 წელს ბრიტანეთში დაგეგმილ ალიანსის სამიტზე გადაეცეს.
მასალის გამოყენების პირობები
