"სოჭის ოლიმპიური თამაშები დასრულდა. ჩვენ მოველით, რომ რუსეთი საქართველოზე გაზრდის პოლიტიკურ ზეწოლას ევროკავშირთან ასოცირების ხელშეკრულების ხელმოწერამდე. ამ კონტექსტში, ჩვენთვის დიდი ფასი ექნება აშშ-ის ადმინისტრაციის, კონგრესის, კვლევითი ცენტრების, აგრეთვე არასამთავრობო ორგანიზაციებისა და მედიის მხარდაჭერას საქართველოს ევროპული არჩევანის, როგორც ეუთოს ჰელსინკის საბოლოო აქტით დაცული სუვერენული უფლებისადმი, და მისი ევროპული ინტეგრაციის პროცესის მიმართ ხელშეწყობას, რუსეთისათვის სათანადო და მუდმივი გზავნილების მიწოდების გზით ",- ამის შესახებ საქართველოს პრემიერ-მინისტრმა ირაკლი ღარიბაშვილმა აშშ-ს ატლანტიკურ საბჭოში გამოსვლისას განაცხადა.
საქართველოს პრემიერ-მინისტრის განცხადებით, რუსეთი განაგრძობს პროვოკაციებს, კერძოდ, ცხინვალისა და აფხაზეთის რეგიონებში საოკუპაციო ხაზის გასწვრივ მავთულხლართებისა და ბარიერების აღმართვას.
„ეს ფიზიკური დაბრკოლებები არღვევს ადგილობრივი მოსახლეობის ისეთ უფლებებს, როგორიცაა სკოლების, დამუშავებული მიწის ნაკვეთების, წყლის საირიგაციო სისტემების ხელმისაწვდომობა და სხვ. ისინი ასევე არღვევენ საქართველოს სუვერენიტეტსა და ტერიტორიულ მთლიანობას",- განაცხადა პრემიერმა.
ირაკლი ღარიბაშვილმა აღნიშნა, რომ ეს მხოლოდ ნაწილია იმ ყოვლისმომცველი მოქმედებისა, რომელიც მიზნად ისახავს რუსეთის მხრიდან საქართველოზე, ისევე როგორც აღმოსავლეთ ევროპის მთელ რიგ სხვა ქვეყნებზე, ევროპული ინტეგრაციისაკენ სწრაფვის წინააღმდეგ მიმართული ზეწოლის განხორციელებას.
„კონსოლიდირებული საერთაშორისო მხარდაჭერა რუსეთის პროვოკაციების აღკვეთის ერთადერთი საშუალებაა. საქართველო დიდად აფასებს იმას, რომ შეერთებულ შტატებს მტკიცე პოზიცია აქვს რუსეთის დესტაბილიზაციურ პოლიტიკასთან დაკავშირებით და საჯაროდ გმობს რუსეთის საოკუპაციო ძალების მიერ ცხინვალისა და აფხაზეთის რეგიონებში საოკუპაციო ხაზის გასწვრივ მავთულხლართებისა და სხვა ხელოვნური დაბრკოლებების აღმართვის ფაქტებს. ჩვენ იმედი გვაქვს ამ საკითხებში ჩვენი მეგობრებისა და პარტნიორების შემდგომი უცვლელი მხარდაჭერისა", - განაცხადა საქართველოს პრემიერ-მინისტრმა.
ჩვენ არ ვაპირებთ კომპრომისზე წასვლას და ჩვენი ევროპული მომავლის ასე უბრალოდ დათმობას. მოგიწოდებთ, დაგვიჭიროთ მხარი - ირაკლი ღარიბაშვილი
აშშ-ის ატლანტიკურ საბჭოში ირაკლი ღარიბაშვილმა გამოსვლის დასკვნითი ნაწილი დაუთმო რუსეთ-საქართველოს ურთიერთობასა და საქართველოს ევროინტეგრაციისაკენ სწრაფვას.
"საქართველოს მთავრობა, ყოველ ღონეს ვიხმართ, ჩვენი შესაძლებლობის ფარგლებში, გავუძლოთ შესაძლო გარეშე ზეწოლასა და ძალდატანებას, რადგან ჩვენ არ ვაპირებთ კომპრომისზე წასვლას და ჩვენი ევროპული მომავლის ასე უბრალოდ დათმობას. მოგიწოდებთ, დაგვიჭიროთ მხარი, და არა იმიტომ, რომ ან ერთიანი არა ვართ, ან არა ვართ დარწმუნებული ჩვენს მისწრაფებებში, არამედ იმიტომ მოვუწოდებთ ჩვენს დასავლელ მეგობრებს დახმარებისკენ, რომ გავუძლოთ უცხოურ ზეწოლას, რომელიც ემუქრება საბჭოთა იმპერიის დაშლის შემდეგ თავისუფალი მსოფლიოს მიერ ჩვენს რეგიონში განხორციელებულ მიღწევებს შეცვლითა და უკან დაბრუნებით. „ - განაცხადა პრემიერ-მინისტრმა.
ღარიბაშვილმა ქვეყნის წინაშე მდგარი გამოწვევები საბჭოთა ოკუპაციის თარიღსაც დაუკავშირა. ,,დღეს 25 თებერვალია. 93 წლის წინ წითელი არმია შემოიჭრა თბილისში და საქართველოს დემოკრატიული რესპუბლიკის დამოუკიდებელმა სახელმწიფომ არსებობა შეწყვიტა, რამაც 70 წლით უკან დახია ქართველი ხალხის ისტორიული სვლა. სასიცოცხლოდ მნიშვნელოვანია, რომ ამგვარი ისტორიული ტრაგედიები აღარ განმეორდეს 21-ე საუკუნეში. „ - განაცხადა პრემიერმა სიტყვის დასასრულს.
აშშ-ს ჩვენ მივიჩნევთ ჩვენს კარიბჭედ ჩრდილოატლანტიკურ ალიანსში. ჩვენ ვამაყობთ იმით, რომ ვართ უსაფრთხოების ამ საერთაშორისო მისიების ავანგარდში - ირაკლი ღარიბაშვილი
აშშ-ის ატლანტიკური საბჭოს წინაშე სიტყვით გამოსვლისას ღარიბაშვილმა საქართველოს საერთაშორისო სამხედრო მისიებიებში მონაწილეობაზე ისაუბრა.
,,აშშ-ს ჩვენ მივიჩნევთ ჩვენს კარიბჭედ ჩრდილოატლანტიკურ ალიანსში. საქართველოს ნატოში ინტეგრაციის ტემპი ამჟამად ისეთი დინამიკურია, როგორც არასდროს. ჩვენ ვაგრძელებთ წინსვლას ალიანსის წევრობისკენ ნატო-საქართველოს კომისიისა და წლიური ეროვნული პროგრამის დახმარებით. საქართველოს შეიარაღებული შენაერთები გადანაწილებულია ISAF-ის მისიაში. მიუხედავად დიდი დანაკარგებისა ავღანეთში, ჩვენი მხარდაჭერა არ შემცირებულა - ჩვენ ვრჩებით ამ მისიის ერთგული და ასე ვაგრძელებთ ჩვენი წვლილის შეტანას გლობალური უსაფრთხოების საქმეში. ჩვენ დავრჩებით ავღანეთში ISAF-ის მისიის ფარგლებში და მონაწილეობას მივიღებთ ასევე ISAF-ის მისიის შემდგომ პერიოდშიც. გარდა ამისა, ჩვენ მზად ვართ ხელი შევუწყოთ ინსტიტუციონალური მშენებლობის პროცესს ავღანეთში, მათ შორის, ჩვენი გამოცდილების გაზიარებითაც. ამავე დროს, ჩვენი შეიარაღებული დანაყოფები ამჟამად გადიან სპეციალურ მომზადებას და უკვე 2015 წელს ისინი ხელმისაწვდომი იქნებიან ნატოს რეაგირების ძალებისათვის. ნება მომეცით, კიდევ ერთხელ გავუსვა ხაზი და ვთქვა - ჩვენ ვამაყობთ იმით, რომ ვართ უსაფრთხოების ამ საერთაშორისო მისიების ავანგარდში. „ _ განაცხადა პრემიერმა.
რაც შეეხება ქართულ მედიას, ის ისეთივე თავისუფალია პოლიტიკური ზეგავლენისგან, როგორც ნებისმიერ სხვა დემოკრატიულ სისტემაში - ირაკლი ღარიბაშვილი
აშშ-ს ატლანტიკურ საბჭოში გამოსვლისას პრემიერ-მინისტრმა საქართველოში დემოკრატიის კონსოლიდაციის კუთხით წინგადადგმულ ნაბიჯებს გაუსვა ხაზი.
,,ჩვენ აღმოვფხვერით ელიტარული კორუფციის, ფულის გათეთრებისა და ბიზნესზე მთავრობის წნეხის მავნე პრაქტიკა; არსებითი რეფორმები განხორციელდა მართლმსაჯულების სექტორში სასამართლოს დამოუკიდებლობის უზრუნველსაყოფად - ამ ძალისხმევის შედეგად სასამართლო თანდათან იბრუნებს ქართული საზოგადოების დაკარგულ ნდობას. ჩვენ ძალიან კარგად გვესმის, რომ დამოუკიდებელი სასამართლო სისტემა ეს არის ნებისმიერი დემოკრატიის ქვაკუთხედი; ამიტომ ყოველ ღონეს ვხმარობთ იმის უაზრუნველსაყოფად, რომ სასამართლო რეფორმა მთავრობის მიერ განხორციელებულ რეფორმებს შორის იყოს ყველაზე თანამიმდევრული და მკაცრი. „ - განაცხადა ღარიბაშვილმა.
პრემიერი ადამიანის უფლებებსა და მედიის თავისუფლებასაც შეეხო: ,,საქართველომ მნიშვნელოვანი ნაბიჯები გადადგა ვითარების გასაუმჯობესებლად ადამიანის უფლებების კუთხით, უმცირესობათა უფლებების ჩათვლით. ხოლო, რაც შეეხება ქართულ მედიას, ის ისეთივე თავისუფალია პოლიტიკური ზეგავლენისგან, როგორც ნებისმიერ სხვა დემოკრატიულ სისტემაში. „ - აღნიშნა პრემიერმა.
