საქართველოს მთავრობას აქვს თეთრი სახლის სრული მხარდაჭერა - ამის შესახებ საქართველოს საგარეო საქმეთა მინისტრმა, მაია ფანჯიკიძემ განაცხადა. ფანჯიკიძის თქმით, ობამამ აღნიშნა, რომ თეთრ სახლში არ არის ისეთი არავინ, ვინც მხარს არ უჭერს საქართველოს ტერიტორიულ მთლიანობას, სუვერენიტეტს, მის თავისუფალ არჩევანს გახდეს დიდი ევროპული ოჯახის წევრი, ასევე ნატო-სკენ მიმავალ გზაზე გაიაროს ახალი ნაბიჯები.
"და საერთოდ, საქართველოს მთავრობას აქვს თეთრი სახლის სრული მხარდაჭერა. ეს იყო პირველი და ყველაზე მნიშვნელოვანი გზავნილი",- განაცხადა მაია ფანჯიკიძემ. მისივე თქმით, გარდა ამისა, ბარაკ ობამამ საქართველოს პრემიერს და ქართულ დელეგაციას მადლობა გადაუხადა საქართველოს მიერ ISAF-ის მისიაში შეტანილი წვლილისთვის.
"მან აღნიშნა, რომ საქართველოს ევროპული და ევროატლანტიკური ინტეგრაცია უნდა იყოს შეუქცევადი პროცესი, რაც პრემიერმა მას დაუდასტურა. მან აღგვიქვა ასევე ამ მიმართულებით სრული მხარდაჭერა. იყო კიდევ ერთი მნიშვნელოვანი ასპექტი - პრემიერმა აღნიშნა, რომ საქართველოსა და აშშ-ის შორის მიუხედავად სტრატეგიული პარტნიორობისა, არ არის ისეთი ეკონომიკური თანამშრომლობა, რომელიც ეკადრება ჩვენს პოლიტიკურ ურთიერთობებს. ობამამ ამ მიმართულებიც აღუთქვა დახმარება საქართველოს პრემიერს",- განაცხადა მაია ფანჯიკიძემ.
