„საქართველოს ახალგაზრდა კონსტიტუციონალისტთა ასოციაციის" პოზიციით საგულისხმოა, რომ პრეზიდენტ მარგველაშვილის მოხსენება საქართველოს პარლამენტში ახლადამოქმედებული კონსტიტუციური ნორმების მიმოხილვით დაიწყო, რაც სამომავლოდ საზოგადოებაში ქვეყნის უზენაესი კანონისადმი ინტერესს გააძლიერებს. სახელმწიფოს მეთაურმა საკმაოდ სიღრმისეულად გაანალიზა ძირითადი კანონის ის რედაქცია, რომელიც ძალაში სწორედ მისი ინაუგურაციის დღიდან - 2013 წლის 17 ნოემბრიდან შევიდა. ამ კონტექსტში მისასალმებელია, რომ პრეზიდენტმა, შეიძლება ითქვას, უმტკივნეულოდ მიიღო მისი უფლებამოსილებების შემცირების ფაქტი. თუმცა, სახელმწიფოს მეთაურის არჩევის წესიდან გამომდინარე, რისკი იმისა, რომ მომდევნო პრეზიდენტებს გაუჩნდებათ აღმასრულებელი ხელისუფლების კომპეტენციებში ჩარევის სურვილი, კვლავინდებურად არსებობს.
მნიშვნელოვანია გიორგი მარგველაშვილის მიერ საკონსტიტუციო რეფორმის ნიუანსებზე აპელირებაც. თუმცა, შეიქმნა შთაბეჭდილება, რომ პრეზიდენტი მმართველობის ამჟამად მოქმედ მოდელს საპარლამენტო მოდელად განიხილავს, რაც გარკვეულ კითხვის ნიშნებს ტოვებს. აღსანიშნავია, რომ 2009-2010 წლის საკონსტიტუციო რეფორმის ფარგლებში მართლაც გადაიდგა ნაბიჯები საპარლამენტო მმართველობისკენ, თუმცა, რიგი ფაქტორებიდან გამომდინარე, მათ შორის, საქართველოში საპარლამენტო ძალმოსილების ინდექსის (Parliamentary Power Index) გათვალისწინებით, ჯერ-ჯერობით ვერ ხერხდება ევროპულ, საპარლამენტო მმართველობის სახელმწიფოებში დამკვიდრებულ სტანდარტებამდე მიახლოვება. შესაბამისად, ასოციაციის პოზიციით, დაგეგმილი საკონსტიტუციო რეფორმის მასშტაბები არ უნდა შემოიფარგლებოდეს მხოლოდ წერტილოვანი ცვლილებებით. არამედ, ვენეციის კომისიის რეკომენდაციათა საფუძველზე უნდა მოხდეს საქართველოს კონსტიტუციაში ნდობა-უნდობლობის მექანიზმების ახლებურად გააზრება. აგრეთვე, შესაძლებელია გადაისინჯოს სახელმწიფოს მეთაურის არჩევის წესი, დაიხვეწოს ინტერპელაციასთან დაკავშირებული პროცედურები და ა.შ. რაც მთავარია, სასურველია, რომ ეს ყოველივე განხორციელდეს კონსტიტუციის მეორე თავში რიგი სოცილაური უფლებების დამატებით რეგლამენტაციასთან და კონსტიტუციის გადასინჯვის ისეთი წესის დამკვიდრებასთან ტანდემში, რომელიც უზრუნველყოფს საზოგადოების ფართო ჩართულობას საკონსტიტუციო რეფორმაში. ამდენად, სასურველი იქნებოდა პრეზიდენტს ზემოაღნიშნულ ასპექტებზეც გაემახვილებინა ყურადღება.
ამასთან, ასოციაცია მიესალმება საქართველოს პრეზიდენტის მოხსენებაში იმ აქცენტებს, რომელიც ადგილობრივი თვითმმართველობის კოდექსთან დაკავშირებით იქნა გაკეთებული. კერძოდ, იმ გარემოებას, რომ სახელმწიფოს მეთაური აცნობიერებს თვითმმართველობის წარმატებული რეფორმირებისთვის მხოლოდ შესაბამისი საკანონმდებლო ბაზის არასაკმარისობას და ყურადღებას ამახვილებს თვითმმართველობის კოდექსის ყოველდღიურ ცხოვრებაში ამოქმედებაზე. ამ მიმართულებით, ანალოგიური დამოკიდებულება შეინშნება აღმასრულებელი და საკანონმდებლო ხელისუფლების წარმომადგენელთა შორის და, იმედია, რომ პრეზიდენტის მოხსენების აღნიშნული ნაწილი დამატებითი სტიმული იქნება ადგილობრივი თვითმმართველობის მოხელეთა კვალიფიკაციის ამაღლების მიზნით ინტენსიური ღონისძიებების გატარების საქმეში.
