საქართველოს პრემიერ-მინისტრი აშშ-ში ვიზიტის ფარგლებში შეხვედრებს თეთრ სახლში, ამერიკის სახელმწიფო დეპარტამენტში, სენატსა და კონგრესში გამართავს. როგორც მთავრობის კანცელარიის საგარეო ურთიერთობათა სამსახურის მრჩეველმა დავით მაღრაძემ განაცხადა, ვიზიტის ფარგლებში დაგეგმილია უმნიშვნელოვანესი შეხვედრები სხვადასხვა თანამდებობის პირებთან.
„სამუშაო შეხვედრები გაიმართება თეთრ სახლში, აშშ-ის სახელმწიფო დეპარტამენტში, სენატსა და კონგრესში. გარდა ამისა, საქართველოს დელეგაციას შეხვედრები ექნება ათასწლეულის გამოწვევის კორპორაციაში. გაიმართება პრემიერ-მინისტრის შეხვედრა არასამთავრობო ორგანიზაციებისა და კვლევითი ცენტრების წარმომადგენლებთან, მათ შორის ატლანტიკურ საბჭოში, სადაც ირაკლი ღარიბაშვილი დამსწრე საზოგადოებას სიტყვით მიმართავს. იგეგმება შეხვედრები მსხვილი ბიზნესის წარმომადგენლებთანაც", - განაცხადა დავით მაღრაძემ.
კანცელარიის საგარეო ურთიერთობათა სამსახურის მრჩევლის ინფორმაციით, ვიზიტისადმი დიდი ინტერესის გათვალისწინებით, იგეგმება პრემიერ-მინისტრის შეხვედრები ამერიკული და მსოფლიო მედიის წარმომადგენლებთან. საქართველოს პრემიერ-მინისტრისა და სამთავრობო დელეგაციის ვიზიტის სხვა დეტალები ამ დროისთვის ზუსტდება. საქართველოს პემიერ-მინისტრი ირაკლი ღარიბაშვილი, აშშ-ის ვიცე-პრეზიდენტ ჯოზეფ ბაიდენის მიწვევით, სამთავრობო დელეგაციასთან ერთად სამუშაო ვიზიტით აშშ-ში 22 თებერვალს მიემგზავრება.