,,ნაცმოძრაობის" წევრი ნუგზარ წიკალური ,,ჯი-ეიჩ-ენთან" საუბარში აცხადებს, რომ პრეზიდენტ გიორგი მარგველაშვილის საკანონმდებლო ორგანოში გამოსვლა ქვეყნის წინაშე მდგარ გამოწვევებს არ პასუხობდა. როგორც საკითხის კომენტირებისას წიკლაურმა განაცხადა პრეზიდენტი ქვეყანაში მიმდინარე პროცესებზე რეალურად ინფორმირებული არ არის.
,,მიმაჩნია, რომ მთლიანობაში პრეზიდენტის გამოსვლა არ იყო ისეთი, რომელიც ადეკვატურად პასუხობდა ქვეყნის წინაშე მდგარ გამოწვევებს. ეს იყო გამოსვლა ლიდერის, რომელსაც რეალური წვდომა არ აქვს ქვეყანაში მიმდინარე პროცესებზე", _განაცხადა წიკლაურმა, რომელიც გიორგი მარგველაშვილის უკრაინაში მიმდინარე პროცესებთან დაკავშირებით გამოთქმული პოზიციით უკმაყოფილოა.
,,მარგველაშვილმა გამოსვლაში უკრაინის მოვლენებზე ილაპარაკა და ვფიქრობ, მისი შეფასებები, ადეკვატური არ იყო. მან ილაპარაკა საზოგადოებრივი თანხმობის მნიშვნელობაზე უკრაინაში. რეალურად უკრაინაში მიმდინარეობს ორი იდეოლოგიის ტრაგიკული შეჯახება და არა საზოგადოებაში რაღაც განსხვავებული მოსაზრების დაპირისპირება. უკრაინაში მიმდინარეობს დემოკრატიისა და ტირანიის ბრძოლა", _განაცხადა წიკლაურმა.
საპარამენტო უმცირესობის წევრი გიორგი მარგველაშვილის ეკონომიკურ საკითხზე გამოთქმულ პოზიციას ასევე ნეგატიურად აფასებს.
,,პრეზიდენტმა თავის მოხსენებაში ასევე ისაუბრა ქვეყნის ეკონომიკურ განვითარებაზე და იყო ძალიან ზედაპირული საუბარი ეკონომიკური მაჩვენებლის ზრდაზე. ვფიქრობ, პრეზიდენტისა და მთავრობის წევრების გარდა საქართველოში ეკონომიკური მაჩვენებლის ზრდას ვერავინ გრძნობს", _განაცხადა ,,ჯი-ეიჩ-ენთან" საუბარში წიკლაურმა.