,,ჩემთვის აღმაფრთოვანებელია საქართველოს მართლმადიდებელი ეკლესიის ხელმძღვანელის პოზიცია, როდესაც საქმე ეთნიკურ ან რელიგიურ ჩაგვრას ეხება , - ამის შესახებ, საქართველოს პრეზიდენტმა გიორგი მარგველაშვილმა პარლამენტის წინაშე სიტყვით გამოსვლისას განაცხადა.
"თვითმმართველობა უმნიშვნელოვანესია ჩვენნაირი ეთნიკურად და რელიგიურად მრავალფეროვანი ქვეყნისთვის, რადგან ეთნიკური, რელიგიური, სოციალური ჯგუფების ეფექტური ჩართვა სახელმწიფოს მმართველობაში, თანამონაწილეობის შეგრძნების გაზრდა და იმის შეგრძნება რომ რეალურად ყველანი ერთად ვმართავთ და ვავითარებთ ჩვენს საერთო ქვეყანას, არის ის, როგორ შეიძლება აყვავდეს ჩვენი ქვეყანა. ასე ქმნიდა გაერთიანებულ, ძლიერ საქართველოს ჩვენი ყველაზე დიდი მეფე დავით აღმაშენებელი. ამ ტრადიცებზე ხორციელდებოდა და ვიტარდებოდა ჩვენი კულტურა, ამიტომ ჩვენს ქვეყანაში საუკუნეების განმავლობაში თანაარსებობდნენ სხვადასხვა კონფესიების, სხვადასხვა რელიგიური შეხედულებები, სხვადასხვა ეთნიკური შეხედულებების წარმომადგენლები. ეს ხორციელდებოდა ქრისტიანულ ქვეყანაში. დიახ, შემწყნარებლობა უპირველესად სწორედ ქრისტიანული ფასეულობა და ტრადიციაა. მართლმადიდებელი ეკლესიის როლი, რომელიც ხაზგასმულია ჩვენს კონსტიტუციაში, მნიშვნელოვანია ჩვენს სულიერ და საზოგადოებრივ ცხოვრებაში. ეს როლი ყვავის და ვითარდება სწორედ ქართული ტრადიციების და ქართული ტოლერანტობის პირობებში. მინდა, ხაზგასმით აღვნიშნო, რომ ჩემთვის აღმაფრთოვანებელია საქართველოს მართლმადიდებელი ეკლესიის ხელმძღვანელის პოზიცია, როდესაც საქმე ეხება ეთნიკურ ან რელიგიურ ჩაგვრას", - განაცხადა მარგველაშვილმა.
