საქართველოს პრეზიდენტი გიორგი მარგველაშვილი უკრაინაში განვითარებულ მოვლენებთან დაკავშირებით საგანგებო განცხადებას ავრცელებს, საიდანაც ირკვევა, რომ გიორგი მარგველაშვილი ვიქტორ იანუკოვიჩს მოუწოდებს ყველა ძალისხმევა გამოიყენოს, რათა შეაჩეროს ძალადობა მომიტინგეთა მიმართ და დაიწყოს დიალოგი ოპოზიციასთან.
„გვინდა გამოვხატოთ უაღრესი შეშფოთება უკრაინაში და კერძოდ, კიევში განვითარებული მოვლენების გამო.
ამ მოვლენების შედეგად ათობით ადამიანი გარდაიცვალა და ასობით ადამიანი დაშავდა. მსურს მივუსამძიმრო გარდაცვლილთა ოჯახებს, მათ შორის საქართველოს მოქალაქის ზურაბ ხურციას ოჯახს. მიმაჩნია, რომ სიტუაცია კიევში საგანგაშოა.
მოვუწოდებ ჩემს კოლეგას ვიქტორ იანუკოვიჩს ყველა ძალისხმევა გამოიყენოს, რათა შეაჩეროს ძალადობა მომიტინგეთა მიმართ და დაიწყოს დიალოგი ოპოზიციასთან.
ვუერთდები ჩემი კოლეგების, ევროპის ლიდერების პოზიციას - მოხდეს სიტუაციის დეესკალაცია და უკრაინის ხელისუფლება ოპოზიციასთან მოლაპარაკების მაგიდასთან დაჯდეს.
მანამდეც, ამ საკითხების შეფასებისას, ხაზგასმით აღვნიშნეთ, რომ უმაღლეს ხელისუფალთათვის ყველაზე მთავარი ღირებულება ადამიანის სიცოცხლე, ქვეყნის ერთიანობა და სუვერენირტეტია. იმედი მაქვს, უკრაინაში მიმდინარე მოვლენები ამ თვეში გადაწყდება"- აცხადებს პრეზიდენტი.
