საქართველოს პარლამენტის თავმჯდომარე დავით უსუფაშვილი საპარლამენტო დელაგაციასთან ერთად ოფიციალური ვიზიტით უნგრეთს ესტუმრა.
დავით უსუფაშვილთან ერთად უნგრეთს პარლამენტის წევრები: თედო ჯაფარიძე, ივანე კიღურაძე, დავით ონოფრიშვილი და თინათინ ბოკუჩავა ეწვივნენ.
ვიზიტის პროგრამით გათვალისწინებულ პირველ ოფიციალურ შეხვედრას პარლამენტის თავმჯდომარე დღეს გამართავს.
ორი დღის განმავლობაში დაგეგმილია შეხვედრები უნგრეთის პრეზიდენტთან, იანოშ ადერთან, სახელმწიფო მინისტრთან საგარეო ურთიერთობათა საკითხებში, ჟოლტ ნემეტთან, თავდაცვის მინისტრთან, ჩაბა ჰენდესთან, უნგრეთის ეროვნული ასამბლეის სპიკერთან, ლასლო კოვერთან და ეროვნული ასამბლეის საგარეო საქმეთა კომიტეტის თავმჯდომარესთან, მიჰაი ბალასთან.
როგორც ,,ჯი-ეიჩ-ენს" საკანონმდებლო ორგანოდან აცნობეს ვიზიტის ფარგლებში დავით უსუფაშვილი ცენტრალური ევროპის უნივერსიტეტსაც ეწვევა, სადაც ქართველ სტუდენტებს შეხვდება და ლექციას წაიკითხავს.
საქართველოს პარლამენტის თავმჯდომარე დავით უსუფაშვილი ოფიციალურ ვიზიტს უნგრეთში 14 თებერვალს დაასრულებს.
