პრემიერ-მინისტრის სპეციალური წარმომადგენლის რუსეთთან ურთიერთობის საკითხებში ზურაბ აბაშიძის განცხადებით, ოს სეპარატისტთა ლიდერი ლეონიდ თიბილოვი სოჭის ოლიმპიადაზე ოფიციალურად მიწვეული არ არის. როგორც საკითხის კომენტირებისას აბაშიძემ დღეს გამართულ პრესკონფერენციაზე განმარტა ოლიმპიურ თამაშებზე მხოლოდ იმ ქვეყნის წარმომადგენლები არიან მიწვეული, რომლებიც ოლიმპიადაში მონაწილეობენ.
,, გუშინ გავრცელდა ინფორმაცია იმის შესახებ, თითქოს, სამხრეთ ოსეთის დეფაქტო ხელმძღვანელი ოფიციალურად მიწვეულია სოჭის ოლიმპიადაზე. სამწუხაროდ, არალეგიტიმური რეჟიმის პრესსამსახურის სრულიად უცნობი ხელმძღვანელის ეს განცხადება სწრაფად აიტაცა ჩვენი პოლიტიკური სპექტრის ერთმა ჯგუფმა და სწრაფად, ელვისებურად გაუაზრებელი, ნაჩქარევი განცხადებები გააკეთეს. ჩვენ, რა თქმა უნდა, ეს ინფორმაცია გადავამოწმეთ და რუსეთის საგარეო საქმეთა სამინიტრომ, ისევე როგორც საერთაშორისო ოლიმპიურმა კომიტეტმა კიდევ ერთხელ დაგვიდასტურეს, რომ სოჭის ოლიმპიადაზე ოფიციალურად მიწვეულნი არიან მხოლოდ იმ ქვეყნების სპორტსმენები და იმ ქვეყნების წარმომადგენლები, რომლებიც ოლიმპიურ თამაშებში მონაწილეობენ", _განაცხადა აბაშიძემ.
შეგახსენებთ, რომ ოსური მედიის გუშინ გავრცელებული ინფორმაციის თანახმად, ოს სეპარატისტთა ლიდერი ლეონიდ თიბილოვი რუსეთის პრეზიდენტმა ვლადიმერ პუტინმა სოჭის ზამთრის ოლიმპიური თამაშების გახსნის საზეიმო ცერემონიალზე დაპატიჟა. მათივე ინფორმაციით, სეპარატისტთა ლიდერი ასევე მიწვეულია და პირადად დაესწრება რუსეთის პრეზიდენტის მიერ გამართულ ოფიციალურ მიღებას, რომელიც 40 ზე მეტი უცხო სახელმწიფოს მეთაურის პატივსაცემად გაიმართება.
„პრეზიდენტი პირადად დაესწრება სოჭის ზამთრის ოლიმპიური თამაშების გახსნას და ასევე მონაწილეობას მიიღებს ყველა სხვა ღონისძიებაში", _ აცხადებს ოს სეპარატისტთა ლიდერის პრესმდივანი განა იანოვსკაია.
ოს სეპარატისტთა ლიდერის გარდა, სოჭის ზამთრის ოლიმპიური თამაშების გახსნას ასევე დაესწრება აფხაზ სეპარატისტთა ლიდერი ალექსანდრე ანქვაბი და სეპარატისტთა დელეგაცია.