5%-იანი ეკონომიკური ზრდა, რომელიც ჩაიდო სახელმწიფო ბიუჯეტში, გარკვეულ ეჭვს იწვევს, აცხადებს ექსპერტი ლია ელიავა. მისივე განმარტებით, ქვეყნის ეკონომიკის ნორმალური ფუნქციონირება და ეკონომიკური აღმავლობა მნიშვნელოვანწილად დამოკიდებულია იმაზე, როგორი იქნება ინფლაციის მაჩვენებელი.
„თუ დეფლაცია ვერ დაიძლია, ვერც მთლიანი შიდა პროდუქტის მნიშვნელოვანი ზრდა გვექნება და ვერ სახელმწიფო ბიუჯეტი შესრულდება სრულად. დეფლაციის დაძლევის ამოცანა მთლიანად აკისრია საქართველოს ეროვნულ ბანკს, რომელსაც ამ მიმართულებით ჯერჯერობით თავისი ინსტრუმენტები სრულყოფილად არ აუმოქმედებია"- აცხადებს ექსპერტი.
ლია ელიავას თქმითვე, ბოლო პერიოდში შეინიშნება ლარის გაცვლითი კურსის რყევები. თუმცა, მისივე აზრით, სავალუტო კურსის რყევის შედეგად ფასების დონის მატება არ არის ის ოპტიმალური გადაწყვეტილება, რომელიც ქვეყნის ეკონომიკის გამოცოცხლებას შეუწყობს ხელს.
„აუცილებელია მოსახლეობის გადახდისუნარიანი მოთხოვნის სტიმულირება, რისი განხორციელებაც პირდაპირ საპირისპიროა ეროვნული ბანკის მიერ ეკონომიკიდან ლარის ამოღების პოლიტიკისა.
დღევანდელი გადასახედიდან ვფიქრობ, რომ 5%-იანი ეკონომიკური ზრდა, რომელიც ჩაიდო სახელმწიფო ბიუჯეტში, გარკვეულ ეჭვს იწვევს. აქ მნიშვნელოვან როლს ითამაშებს ის გარემოება, როგორი იქნება პოლიტიკური ვითარება. არსებული დაპირისპირების გაღრმავება და მუდმივი "გაწევ-გამოწევა" დაამუხრუჭებს ეკონომიკას.
მეორე, 2014 წელს დიდი მოცულობის საგარეო ვალია გადასახდელი, რისთვისაც ასევე დიდი მოცულობის სესხის აღებაა გათვალისწინებული. თუმცა, ისევე როგორც მიმდინარე წელს, სახელმწიფო ბიუჯეტი თავისი ვალდებულებების შესრულებას უთუოდ გაართმევს თავს"- განმარტავს ექსპერტი ლია ელიავა.
როგორც ექსპერტი აცხადებს, პოზიტიური დინამიკაა მოსალოდნელი საგარეო ვაჭრობის კუთხით. ექსპორტის ზრდის ვექტორი, რომელიც აშკარად გამოიკვეთა მიმდინარე წელს, მომავალშიც შენარჩუნდება. გაიზრდება იმპორტიც, თუმცა, ექსპორტის ზრდასთან შედარებით, დაბალი ტემპებით. საგარეო ვაჭრობის განვითარებას ხელს შეუწყობს ვილნიუსში ხელმოწერილი მემორანდუმი ევროკავშირთან ასოცირების შესახებ.
„რაც შეეხება დასაქმებას, ამ მხრივ დიდ პოზიტიურ ცვლილებებს არ უნდა ველოდოთ. შედარებით გაუმჯობესდება დასაქმების დონე სოფლის მეურნეობასა და ტურიზმის სფეროებში, აგრეთვე, ინფრასტრუქტურულ მშენებლობებში.
მთლიანობაში კვლავაც მძიმე წელია მოსალოდნელი"- აცხადებს ექსპერტი ლია ელიავა.
