როგორი იყო ქვეყნისთვის 2013 წელი და რას უნდა ველოდეთ 2014 წლისგან, როგორი იქნება ცხენის წელი ქვეყნისთვის, პოლიტიკოსებისთვის, რა ტაქტიკით უნდა იმოქმედონ მათ, მოსალოდნელია თუ არა მომავალ წელს რევოლუციები და საპროტესტო აქციები? "პრემიერს" ასტროლოგი მიხეილ ცაგარელი ესაუბრა.
_ ბატონო მიხეილ, რას გვეტყვით განვლილ 2013 წელზე, როგორი იყო ქვეყნისთვის გველის წელი?
_ ვამბობდი, 2013 წელი იქნებოდა სტაგნაციის წელი, ბევრი რამ შეფერხდებოდა და ვსაუბრობდი, იმაზეც, რომ იქნებოდა პოლიტიკური ცვლილებები, რაც ვნახეთ კიდეც. თუმცა 2013 წელმა გარკვეული საფუძველი შექმნა იმისთვის, რომ ქვეყანა 2014 წლიდან უფრო განვითარდეს. ამიტომ 2014 წლიდან დადებითი ტენდენციები იქნება სოციალური, ეკონომიკური განვითარების კუთხით. ამ თვალსაზრისით 2013 წელმა მაინცდამაინც დიდი დივიდენდები არ მოგვიტანა.
_ რაც შეეხება 2014 წელსა და ცხენის წელს როგორი იქნება ის საქართველოსა და მსოფლიოსთვის?
_ 2014 წელი 2013 წელთან შედარებით უფრო სასიკეთოა, რადგან 2013 წელმა დაასრულა სამყაროს სამწლიანი დაძაბულობის პერიოდი. 2014 წლიდან საფუძველს უდებს ახალი განვითარების ეტაპს, რომელიც მნიშვნელოვანია მთელი მსოფლიოსთვის, მათ შორის საქართველოსთვის, რადგან კაცობრიობას 2017 წლიდან 2024-ის ჩათვლით საინტერესო პერიოდი აქვს. ეს არის მსოფლიო მასშტაბით დრო სერიოზული ურთიერთანამშრომლობის, ეკონომიკური ზრდის თვალსაზრისით, მათ შორის საქართველოსთვის, ამისთვის კი გარკვეული მოსამზადებელი სამუშაოებია ჩასატარებელი. ამიტომ ჩათვალეთ, 2014 წელი შემადგენელია ამ მატარებლის, სადაც შევდივართ და ჩვენს ადგილს ვიკავებთ. 2017 წლიდან კი საქართველო აიღებს უკვე ზღვრულ სიჩქარეს. 22 წლის განმავლობაში ჩვენ გამოვიარეთ ურთულესი ცხოვრება, შეგვექმნა უამრავი პრობლემა, ამიტომ როგორ შეიძლება ბოლო ერთი წლის განმავლობაში სტაბილურობას მივაღწიოთ. თუმცა ვიმეორებ, რომ 2014 წელი ქვეყნის შემობრუნების პირველი მერცხალია სოციალურ-ეკონომიკური, საგარეო პოლიტიკის მიმართულებით.
_ რაც შეეხება პოლიტიკოსებს, ცხენის წელში რა ტაქტიკით უნდა იმოქმედონ?
_ 2014 წელი ახალი სახეების პერიოდი იქნება. ამიტომ მინისტრების, მინისტრის მოადგილეების დონეებზე, დეპარტამენტის უფროსებად შეიძლება ახალი სახეები ვნახოთ, რომლებიც საკმაოდ საინტერესოები იქნებიან. 2014 წლის პირველი ნახევარი კარგი პერიოდია ურთიერთკომპრომისებისთვის, ხოლო წლის მეორე ნახევარი ყველა პოლიტიკოსის მხრიდან უფრო დიდ ყურადღებას ითხოვს და რატომ? _ ამ პერიოდში მოიმატებს ეგოიზმი, აგრესია, ქედმაღლობის ელემენტები. ამიტომ კონტროლი სჭირდება ზედმეტი ამბიციების გაფართოებას, რადგან ის არ გახდეს ზოგიერთი პოლიტიკოსისთვის თანამდებობის დატოვების წინაპირობა. თუმცა, მთლიანობაში, 2014 წელი დადებითი შესაძლებლობების განვითარების კუთხით, კარგი პერიოდი იქნება.
_ მომავალ წელს უნდა ველოდოთ რევოლუციებს, მასშტაბურ საპროტესტო აქციებს?
_ რევოლუციებისა და ომობანას პერიოდი დასრულდა. უკმაყოფილების გამო სოციალური ხასიათის საპროტესტო აქციები, მანიფესტაციები შეიძლება იყოს, თუმცა რევოლუციებისა და ომობანას პერიოდი საქართველოსთვის წარსულს ჩაბარდა და დასრულებულია.
_ საუბრის დასასრულ, ზოგადად, როგორი იქნება ცხენის წელი ზოდიაქოს ცალკეული ნიშნისთვის და რომელი მათგანისთვის აღმოჩნდება ის გამორჩეული?
_ 2014 წელი ყველაზე კარგი დროა მშვილდოსნის ზოდიაქოს ნიშნის ქვეშ დაბადებული ადამიანებისთვის, ნორმალური პერიოდია კუროსა და ვერძის ჰოროსკოპისთვის, წლის მეორე ნახევარი კარგია ლომის ჰოროსკოპისთვის, თუმცა პირველ ნახევარში სიფრთხილე მართებთ. 2014 წელი ყველაზე რთული პერიოდია მორიელის ზოდიაქოს ნიშნით დაბადებულთათვის. დანარჩენი ზოდიაქოს ნიშნებისთვის ცხენის წელი მეტ-ნაკლებად სტაბილურია. თუმცა მომავალ წელს ყველაზე რთული პერიოდი გვექნება აპრილში, შემდეგ მაისის 10 რიცხვამდე და ნოემბერში, როცა მოიმატებს ეკონომიკური, სოციალური, ჯანმრთელობის პრობლემები.
მირანდა ნაბახტეველი, გაზეთი „პრემიერი"