ე.წ. საზღვრისპირა სოფელ დიცის მრავალსულიანმა, შეზღუდული შესაძლებლობისა და შეჭირვებულმა ოჯახებმა საქველმოქმედო ჰუმანიტარული ცენტრისგან - „აფხაზეთი" საახალწლო ნობათი მიიღეს. ადგილობრივებს საჩუქრები ცენტრის წარმომადგენელმა ნუკრი მილორავამ და გორის მაჟორიტარმა დეპუტატმა სოსო ვახტანგაშვილმა ჩაუტანეს. ტკბილეულობისა და სურსათის სასაჩუქრე პაკეტები კი იტალიის საელჩოსა და მიკროსაფინანსო ორგანიზაცია „კრისტალთან" ერთად მომზადდა.
ცენტრი „აფხაზეთის" წარმომადგენელი ნუკრი მილორავა და მაჟორიტარი დეპუტატი დიცის მოსახლობას შეხვდნენ და მათი ძირითადი საჭიროებები და პრობლემები მოისმინეს. მილორავამ მოსახლეობას ცენტრის მიერ რეგიონში დაგეგმილი და მიმდინარე პროექტებიც გააცნო და აღნიშნა, რომ შიდა ქართლის რეგიონი ცენტრის ერთ-ერთი პრიორიტეტია. ცენტრი რეგიონში 3 წელია პროექტებს ახორციელებს, მათ შორისაა შემოსავლის მომტანი წყაროების პროექტები, მცირე ბიზნესის დაფინანსება, განათლება, სათემო ცენტრების შექმნა და სხვა.
როგორც 6 შვილის მამამ ნარიმან სოსიაშვილმა აღნიშნა, ძალიან უჭირთ, ცხოვრება გაუსაძლიასია და მეტ ყურადღებას ელიან: "6 მცირეწლოვანი შვილის მამა ვარ. ერთ-ერთი შვილი შეზღუდული შესაძლებლობისაა, რომელსაც განსაკუთრებული ყურადღება სჭირდება, მაგრამ ამ პირობებში მხოლოდ არსებობა გვიწევს. პოლისები ჩვენ არ გვადგება და ვართ ასე ორგანიზაციების იმედად, როდის ვინ გამოჩნდება და რას გვაჩუქებს. გვიხარია, რომ "აფხაზეთმა" საახალწლოდ საშუქარი გაგვიკეთა. მეტი ყურადღება გვჭირდება რომ არსებობა გავაგრძელოთ".
საახალწლოდ ნობათი მიიღო 104 წლის დარო მძინარაშვილის ოჯახმაც. ხანდაზმულმა ქალბატონმა სტუმრებს მადლობა გადაუხადა, რომ მის ოჯახს ახალ წელს სუფრის გაშლის შესაძლებლობა ექნება. დიცის მოსახლეობა ძირითად პრობლემად კი დასაქმებას, ჯანდაცვას და მძიმე სოციალურ პირობებს ასახელებს.