არასამთავრობო ორგანიზაცია „ადამიანი, კანონი, თავისუფლებას" თავმჯდომარე, გიორგი ჭულუხაძე და ორგანიზაციის აღმასრულებელი დირექტორი, ნიკოლოზ მაღალდაძე, სასჯელაღსრულების დეპარტამენტის თავმჯდომარე დიმიტრი დარბაისელს შეხვდნენ. შეხვერდის მიზანი დეპარტამენტის საქმიანობისა და სამომავლო გეგმების გაცნობა იყო.
როგორც დეპარტამენტის თავმჯდომარემ აღნიშნა, პენიტენციალურ სისტემაში საკადრო ცვლილებები და სრული რებრენდინგი იგეგმება. როგორც დეპარტამენტში, ასევე სასჯელაღსრულების დაწესებულებებში შენარჩუნებული იქნება ყველა კვალიფიციური კადრი. თანამშრომლებს სისტემატურად ჩაუტარდებათ ტერნინგები კვალიფიკაციის ამაღლების მიზნით. დაგეგმილია მსჯავრდებულების დანაშაულის სიმძიმის მიხედვით კლასიფიკაცია რაც სასჯელაღსრულების დაწესებულებებში ინფრასტრუქტურული განახლების შემდეგ იქნება შესაძლებელი.
ამ დროისათვის მიმდინარეობს სისტემაში არსებული სიტუაციის სრული ანალიზი, სწორი სტრატეგიის შემუშავებისა და განხორცილებისთვის.
დიმიტრი დარბაისელის თქმით, მომავალში სასჯელაღსრულების დაწესებულელებში მიმდინარე მოვლენები საზოგადოებისათვის უფრო ღია და გამჭვირვალე იქნება.
შეხვედრაზე საუბარი სასჯელაღსრულების დეპარტამენტისა და არასამთავრობო ორგანიზაციის სამომავლო თანამშრომლობასაც შეეხო, გამოითქვა მზადყოფნა არასამთავრობო სექტორთან ერთად, პატიმრების რესოციალიზაციისა და რეაბილიტაციის ერთობლივ პროექტებზე სამუშაოდ.
დეპარტამენტის თავმჯდომარემ, ხაზგასმით აღნიშნა, რომ სასჯელაღსრულების დაწესებულებებში არსებული ვითარება სრულად კონტროლდება.
არასამთავრობო ორგანიზაცია „ადამიანი, კანონი, თავისუფლება" მიესალმება დეპარტამენტის თავმჯდომარის სამომავლო გეგმებს და მის შეხედულებებს სისტემაში განსახორციელებლი ცვლილებების შესახებ. აღსანიშნავია, რომ მსგავსი შეხვედრა პირველად განხორციელდა, რაც ღია და გამჭვირვალე სისტემის ჩამოსაყალიბებლად წინგადადგმული ნაბიჯია. შეხვედრის დასრულებისას მოხდა შეთანხმება უახლოეს მომავალში გაიმართოს სამუშაო შეხვედრა გაფართოებული შემადგენლობით და მოხდეს კონკრეტული პროექტების და ინიციატივების განხილვა.
ჩვენს მიერ გამოითქვა სურვილი საახალწლოდ არასრულწლოვან მსჯავრდებულთა მონახულებას და საჩუქრების გადაცემის, რაზეც დეპარტამენტის თავმჯდომარემ სრული მზადყოფნა გამოთქვა და დასძინა, რომ თავადაც შემოგვიერთდება და მიიღებს მონაწილეობას ამ აქციაში.