ღოღობერიძის ქუჩაზე, 33 დევნილ ოჯახს, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ ახალი ბინების გასაღებები გადასცა.
ბინა მიიღო 33-მა დევნილმა ოჯახმა, მათი შერჩევა დევნილთა გრძელვადიანი განსახლების კრიტერიუმების შესაბამისად მოხდა. შესაბამისად, ეს არის უაღრესად გამჭვირვალე, სამართლიანი, ობიექტური განაწილება. მიუხედავად იმისა, რომ ჩვენ უკვე 1500-ზე მეტ ოჯახს გადავეცით ბინები, ეს საკმარისი არ არის, ამიტომ ჯერ კიდევ არიან გულდაწყვეტილი დევნილები, რომლებსაც ამ ეტაპზე ბინა არ შეხვდათ. ჩვენ დარჩენილ დღეებში, წლის ბოლომდე, კიდევ რამდენიმე ათეულ ოჯახს მივანიჭებთ ამ სიხარულს. მომავალი წელის მანძილზე ჩვენ ძალიან გავზრდით ობიექტების რეაბილიტაციის ინტენსივობას და დავიწყებთ ახალ მშენებლობებს - განაცხადა დავით დარახველიძემ.
ღოღობერიძის ქუჩაზე #3-ში მდებარე ყოფილი სკოლის შენობას დევნილთა სამინისტრომ სარეაბილიტაციო სამუშაოები ჩაუტარა და საცხოვებლად გადააკეთა. ასევე, შენობას უნარშეზღუდული პირებისთვის პანდუსი გაუკეთდა.
აღნიშნულ შენობაში სარემონტო სამუშაოები ტენდერში გამარჯვებულმა სამშენებლო კომპანია შპს „ს.ე.ნ."-მა განახორციელა. სარეაბილიტაციო სამუშაოების სატენდერო ღირებულება 562 740 ლარს შეადგენდა. მშენებლობაზე 5 დევნილი იყო დასაქმებული.
შესახლებამდე ერთი დღით ადრე დევნილთა სამინისტროში ბინები ფარული კენჭისყრის პრინციპით განაწილდა. კენჭისყრის მიხედვით გამოვლინდა, თუ ვინ რომელ სართულზე მიიღებს საცხოვრებელ ფართს. 3 სართულიან შენობაში სულ 33 ბინაა, აქედან 12 ერთ ოთახიანი, 18 ორ ოთახიანი და 3 სამ ოთახიანი.
ღოღობერიძის ქუჩაზე მდებარე შენობაში საცხოვრებლის მისაღებად 1300-მდე დევნილმა ოჯახმა შემოიტანა განაცხადი, საიდანაც დევნილთა გრძელვადიანი განსახლების კრიტერიუმების მიხედვით 33 ოჯახი შეირჩა.
დევნილ ოჯახებს სააქციო საზოგადოება „პრივატ ბანკმა" (საქართველო) საახალწლო სასაჩუქრე კალათები გადასცა.
ღონისძიებას ესწრებოდნენ დევნილთა მინისტრი დავით დარახველიძე, მინისტრის მოადგილე ნინო ჭავჭავაძე, მერაბ მენაბდე, მამუკა ცოტნიაშვილი და „პრივატ ბანკის" გენერალური დირექტორის მოადგილე ზურაბ მასურაშვილი.