აჭარის მთავრობის თავმჯდომარემ არჩილ ხაბაძემ რეგიონში მოღვაწე მედიკოსებს პროფესიული დღესასწაული მიუილოცა. 2013 წელს ჯანდაცვის სფეროში შეტანილი წვლილისათვის მათ მადლობის სიგელები და სიმბოლური საჩუქრები გადაეცათ. დაჯილდოებულთა შორის მედიცინის ღვაწლმოსილი მუშაკები, სამედიცინო დაწესებულებების ხელმძღვანელები და სამინისტროს თანამშრომლები არიან.
"მოხარული ვარ, რომ აჭარაში ასეთი ღვაწლმოსილი და გამოცდილი მედიკოსები მუშაობენ. მინდა გამოვყო წლევანდელი პროგრამები, რომლითაც რეგიონის მთავრობამ დამატებით დააფინანსა სხვადასხვა დაავადების მკურნალობა. წელს დაზღვევიდან დამოუკიდებლად რეგიონის ჯანდაცვის სისტემაში 4 711 პაციენტს გაუწიეს მომსახურება. ჩამოყალიბდა ახალი მიდგომები და კომუნიკაცია სამედიცინო დაწესებულებებსა და პაციენტებს შორის. შემიძლია ვთქვა, რომ აჭარის ჯანდაცვის სამინისტრო ერთერთი ყველაზე მოწესრიგებული უწყებაა და პასუხობს საერთაშორისო სტანდარტებს. " - განაცხადა არჩილ ხაბაძემ.
ჯანმრთელობისა და სოციალური დაცვის მინისტრმა ნუგზარ სურმანიძემ შეხვედრაზე სამინისტროს 2013 წლის მუშაობის ანგარიში წარადგინა და 2014 წლის პრიორიტეტებზე ისაუბრა.
პროფესიული დღესასწაული მედიკოსებს უმაღლესი საბჭოს თავმჯდომარემ ავთანდილ ბერიძემ და უმაღლესი საბჭოს ჯანმრთელობისა და სოციალური დაცვის საკითხთა კომისიის თავმჯდომარემ ჯემალ ფუტკარაძემაც მიულოცეს.
აჭარაში მედიცინის მუშაკთა დღე ყოველი წლის 23 დეკემბერს 1996 წლიდან აღინიშნება.
