"პაატა კაჭარავამ ჩაიდინა თაღლითობა, ე.ი. მართლსაწინააღმდეგო მისაკუთრების მიზნით, სხვისი ნივთის დაუფლება, ან ქონებრივი უფლების მიღება მოტყუებით," - ესაა ამონარიდი თბილისის საქალაქო სასამართლოს მოსამართლის, მერაბ ჯორბენაძის მიერ 2006 წლის 17 ოქტომბერს გამოტანილი განაჩენიდან. ეს ის მოსამართლე მერაბ ჯირბენაძეა, რომელზეც საკუთარი ბიძაშვილი, ადვოკატი ზურაბ ჯორბენაძე ამბობს: მოსამართლედ "იმ კორუფციული სქემით არის დანიშნული, რასაც წინა ხელისუფლების პირობებში ჰქონდა ადგილი. ამ მოსამართლეს მიღებული აქვს ცოტნე გამსახურდიას გასამართლების საკმაოდ მძიმე გადაწყვეტილება." ჩვენთვის რომ ვთქვათ, მოსამართლე ჯორბენაძე კაჭარავას საქმეში რიგითი ჭანჭიკია _ მან, როგორც საქმის მასალებიდან ირკვევა, ზემდგომთა ვერდიქტი "გააპრავა". ეს "ზემდგომი" კი, როგორც "ნაციონალურ კოლექტივიზაციას" შეწირული პაატა კაჭარავა აცხადებს, თავდაცვის ყოფილი მინისტრი დავით კეზერაშვილი იყო. ამასთან, კაჭარავა დარწმუნებულია, რომ კეზერაშვილი მიხეილ სააკაშვილთან შეთანხმებით მოქმედებდა.
პაატა კაჭარავა ფართო საზოგადოებისთვის არცთუ ცნობილი ფიგურაა. 2005 წლის მიწირულამდე მის შესახებ თავად "ნაციონალებსაც" არაფერი სცოდნიათ. როგორც ამბობენ, ზურაბ ადეიშვილს უთქვამს კიდეც, თუ ამ კაცს ამდენი ქონება ჰქონდა ჩვენ რატომ არ ვიცოდითო.
პაატა კაჭარავა სს "თბილელექტროაპარატის" სამეთვალყურეო საბჭის თავმჯდომარე და სავაჭრო სახლ "საბას" მეპატრონეა (2012 წლის საპარლამენტო არჩევნების შემდეგ, "საბაში" ხანძარი გაჩდა. არსებობს გონივრული ეჭვი, რომ ეს ხანძარი ე.წ. ნაციონალური საბოტაჟის შემადგენელი ნაწილი იყო). "ნაციონალები" კაჭარავასთვის "საბას" წართმევასაც აპირებდნენ, მაგრამ ბიზნესმენმა, როგორც იტყვიან, ქვა ააგდო და სახელმწიფოს თითქოს ნებაყოფლობით მხოლოდ "თბილელექტროაპარატის" კუთვნილი 6 ჰეტრამდე მიწა, მასზე არსებული შენობა-ნაგებობებით აჩუქა.
მოგვიანებით, კაჭარავას ყოფილი ქონება სახელმწიფომ შპს "მიწა და უძრავ ქონებას" გადაულოცა. როგორც პაატა კაჭარავას თანამესაკუთრე, ირინა ვაჭარაძე ამბობს, შპს "მიწა და უძრავი ქოება" საგანგებოდ ამ აუქციონისთვის შეიქმნა. გარდა ამისა, აუქციონი უკანონო იმიტომაც იყო, რომ ვაჭარაძეს, როგორც ქონების თანამესაკუთრეს, მის შესახებ არ შეატყობინეს, არადა, კანონით, მას ტენდერში მონაწილეობის უპირატესი უფლება ჰქონდა.
იქიდან გამომდინარე, რომ ირინა ვაჭარაძე ერისთავის ქუჩა #8-ში მდებარე სს "თბილელექტროაპარატის" უძრავი ქონების თანამესაკუთრე იყო და მის გარეშე ორთაჭალის ციხეში მყოფი პაატა კაჭარავა სახელმწიფოს 6 ჰექტრამდე მიწას ვერ აჩუქებდა, ფინანსურ პოლიციაში "ბართლომეს ღამე" ქალბატონი ირინასაც მოუწყვეს. ამ ყველაფერს კი, როგორც ორივე დაზარალებული ბიზნესმენი ამბობს, ფინანსური პოლიციის გამომძიებელი კონსტანტინე ყიფიანი დირიჟორობდა, რომელიც დღეს თავდაცვის უწყების თანამშრომელია.
"კონსტანტინე ყიფიანი დავით კეზერაშვილის მარჯვენა ხელი იყო და ფინანსურიდან თავდაცვაში რომ გადავიდა, იქაც წაიყვანა. 2008 წლის აგვისტოს ომის შემდეგ, როცა კეზერაშვილმა მინისტრობა დატოვა, თავდაცვის სამინისტროდან ყიფიანიც წამოვიდა. ახლახან, ტელევიზორს ვუყურებდი და შემთხვევით აღმოვაჩინე, რომ დღეს თავდაცვის სამინისტროში, აპარატის უფროსია. მის წინააღმდეგ 2012 წლის დეკემბერში, მთავარ პროკურატურაში განცხადება მაქვს შეტანილი და მაინტერსებს "ოცნება" ყიფინას რა დამსახურებისთვის მფარველობს?" _ კითხულობს პაატა კაჭარავა.
მისივე თქმით, 2006 წლის 28 ივნისს, ქუჩაში აიყვანეს და ფინანსურ პოლიციაში მიიყვანეს, სადაც ყიფიანმა ან ბიუჯეტში 500 ათასი ლარის შეტანა, ან კიდევ, ვინმეს "ჩაშვება" შესთავაზა, რაზეც უარი მიიღო. ამის შემდეგ, კაჭარავას ორთვიანი წინასწარი პატიმრობა შეუფარდეს, რაც გაასაჩივრა.
"სასამართლომ წინასწარი პატიმრობა 3-მილიონიანი გრაოთი შემიცვალა, მაგრამ ფული არ მქონდა და რას გადავიხდიდი? ამიტომ, გამოვთქვი სურვილი, რომ გირაოში ქონების ნაწილს ჩავდებდი, მაგრამ ქონება იპოთეკით იყო დატვირთული და ამიტომ სასამართლომ უარი თქვა," _ განმარტავას კაჭარავა.
ეს აბსურდის თეატრი იმით დამთავრდა, რომ კაჭარავამ საკანში ადვოკატს, მინდობილობით, კუთვნილი ქონების სახელმწიფოსთვის ჩუქების ნება დართო.
რატომ მივიდა "საბას" მფლობელი ამ გადაწყვეტილებამდე? _ იმიტომ, რომ მხოლოდ თანამშრომლების დაჭერით კი არ დაემუქრნენ, არამედ, მის საცხოვრებელ ბინასაც ყადაღა დაადეს, რაც იმას ნიშავდა, რომ კაჭარავას მეუღლე, ორ მცირეწლოვან შვილთან ერთად, ქუჩაში რჩებოდა, ანუ 6 ჰა-მდე მიწის ნაკვეთის დათმობით, პაატა კაჭარავამ მხოლოდ საკუთარი კი არა, თანამშრომელთა ოჯახებიც გადაარჩინა! ფინანსურმა პოლიციამ და პროკურატურა კაჭარავას საქმე ცალკე გამოყვეს, მისი ორი თანამშრომლის კი, _ ცალკე.
"ყიფიანმა მითხრა, შენი თანამშრომლების საქმეები თაროზე იდება და ოდესმე თუ განაჩენს გაასაჩივრებ, ეს საქმეები გაიღვიძებს და მათაც დავიჭერთო, ანუ ჩემი თანამშრომლები, პრაქტიკულად, მძევლები იყვნენ. ჩვენს მიმართ წაყენებულ ბრალდებას ხანდაზუმოლობის 6-წლიანი ვადა ჰქონდა, რომელიც უკვე გასულია. ხარვეზების დამდგენი კომისიის შექმნა ამიტომაც მინდა, რომ ძიება ხელახლა დაიწყოს," _ ამბობს კაჭარავა.
მას შემდეგ, რაც კეზერაშვილმა და მისმა გარემოცვამ პაატა კაჭარავას ქონების კონპენსაცია მოახდინეს, აღმოჩნდა, რომ "საბას" მეპატრონეს სახელმწიფო ბიუჯეტისთვის ზარალი არ მიუყენებია და ე.წ. დავალიანება 7 მილიონიდან 300-ლარამდე შემცირდა.
სხვათა შორის, როგორც მოგვიანებით გაირკვა, ექსპერტები _ ომანაძე და კალანდაძე, რომლებმაც ერისთავის #5-სა და #8-ში, კაჭარავას საკუთრებაში არსებული მიწის ნაკვეთები შეაფასეს, მიწის ექპსერტები არ იყვნენ!
რაც შეეხება ზემოთნახსენებ შპს "მიწა და უძრავ ქონებას", რომელიც კაჭარავას წართმეულ ქონებას დაეპატრონა, "საბას" მეპატრონეს და მის თანამესაკუთრე ირინა ვაჭარაძეს აქვთ გონივრული ეჭვი, რომ ამ შპს-ს უკან ბოკერია-უგულავა-მერაბიშვილ-ჩოჩელის კლანი დგას. "მიწა და უძრავი ქონება", როგორც კაჭარავა ამბობს, ლისის ტბის მიმდებარე ტერიტორიაზე მიწის ნაკვეთების საქმეშიც ფიგურირებს.
"შპს "მიწა და უძრავი ქონების" საქმიანობით დავინტერესდი და ვნახე ოფიციალური დოკუმენტები, რომლის მიხედვითაც, 2006 წელს, ლისის ტბაზე 42 ჰა-მდე სახელმწიფომ აუქციოზე გამოიტანა და 11 არამეწარმე ფიზიკურმა პირმა 6 ათასის ლარის ფარგლებში შეიძინა, ანუ კვადრატულ მეტრში 1,4 თეთრი გადაიხადა. აუქციონიდან მალევე კი, ამ 11 ფიზიკურმა პირმა მიწის ნაკვეთი შპს "მიწა და უძრავ ქონებას", თუ არ ვცდები, 7 მილიონამდე ევროდ მიჰყიდა. შპს "მიწა და უძრავი ქონების" დამფუძნებელი ოფშორშია დარეგისტრირებული. როგორც ჩანს, აქ რაღაც ფინანსურ მაქიცნაციას ჰქონდა ადგილი _ ან ფული "გათეთრდა", ან "გაცოცხლდა", _ ეჭვობს პაატა კაჭარავა.
ამასთან, "საბას" მეპატრონე ხელისუფლებას სამართლიანობის აღდგენის საკუთარ გზას სთავაზობს: "წართმეული ქონება ვიღაც ხომ გაასხვისა და ვიღაცამ ხომ შეიძინა? _ ამიტომ უნდა დადგინდეს, ეს ქონება რამდენად სამართლიანად გასხვისდა, მით უმეტეს, საჯარო რეესტრის ამონაწერში წერია, რომ ნაჩუქარი ქონებაა, თან მინდობილობა ციხეში მაქვს გაცემული, ანუ რა გამოდის: სახელმწიფოსგან ქონება ჯერ შევიძინე და მერე, ისევ სახელმწიფოს ვაჩუქე?"
სხვათა შორის, მთავარი ბრალდება, რასაც ფინანსური პოლიცია პაატა კაჭარავას უყენებდა, ის იყო, თუ რატომ მიიღო 1999 წელს გამოცხადებულ ფულად აუქციონში მონაწილეობა და კინაღამ ისიც კი დაუბრალებიათ, საქართველოს მაშინდელმა პრეზიდენტმა, ედუარდ შევარდნაძემ სს "თბილელექტროაპარატის" აქციების ღია აუქციონზე გამოტანას ხელი შენი კარნახით მოაწერაო.
"წინა ხელისუფლების ქმედება ჩემს მიმართ არის ყაჩაღობა და კოლექტივიზაცია!" _ ნათქვამია 22-გვერდიან საჩივარში, რომლითაც პაატა კაჭარავამ 2013 წლის 12 აპრილს საქართველოს მაშინდელ მთავარ პროკურორს, არჩილ კბილაშვილს მიმართა. ამავე სარჩელში კაჭარავა ხაზგასმით აღნიშნავს, რომ უკანონო მსჯავრდებული, უკანონოდ ქონებაჩამორთეული და წინა ხელისუფლების მსხვერპლია, თუმცა კბოლაშვილმა მთავარი პროკურორის სავარძელი ისე დატოვა, რომ პაატა კაჭარავასა და სხვა ათასობით ქონებაწართმეული ადმაიანის საქმის შესწავლა ზერელედაც არ უცდია.
ბიზნესმენი პაატა კაჭარავა იმედოვნებს, რომ ახალი მთავარი პროკურორი, ოთარ ფარცხალაძე, ადრე თუ გვიან, "ნაციონალური კოლექტივიზაციით" დაინტერესდება და, ელემენტარულად, წართმეული ქონების საქმეების გამოძიება დაიწყება.
„ჯი-ეიჩ-ენი", ალექსი ნოზაძე
