რედაქციისგან: რამდენიმე თვეა ბატონი ჰენრი კუპრაშვილისა და საპატრულო პოლიციის „ძიძგილაობას" აკვირდება საზოგადოება. იმ ვითარებაში, როდესაც ყველასათვის ნათელია ამ „საქმეში" ბატონი ჰენრის სიმართლე, მორიგჯერ ვრწმუნდებით, ცალკეული მოხელეების მიერ როგორ ითელება სამართალიც და სიმართლეც ძალის წინაშე.
ბატონო ჰენრი კუპრაშვილის მიერ რექაციაში გამოგზავნილ წერილს უცვლელად გთავაზობთ:
„ვაჰ, დედას თქვენსა, ყოვებო,
ცუდ დროს ჩაგიგდავთ ხელადა..."
ვაჟა-ფშაველა
დავდექი არჩევანის წინაშე!
ან მსოფლიო ჩემპიონობისთვის ქვეყნის სასახელოდ ბრძოლა ან საპატრულო პოლიციის ძალადობისა და უტიფრობის, სასამართლოს გაჭიანურებული პროცესების ტყვეობაში ყოფნა...
სამართლის მანტიაში გახვეული მოძალადეები, სახელმწიფო მინისტრის წაყრუება და ... ჩემი მიჯირყვნის მცდელობა ...
შეიძლება ვიღაცამ იკითხოს, საგაზო შემთხვევა, ვის არ მოსვლია, რა პრობლემა გახადეო? მართალიც იქნება, მაგრამ მხოლოდ საგზაო შემთხვევაში რომ იყოს საქმე, ხმას არ ამოვიღებდი (ცხადია, პრობლემა არც დაზიანებული ავტომობილის გაკეთებაშაა, არც ჯარიმის გადახდა... ეს ყველაფერი, ჩვეულებრ საყოფაცხოვრებო შემთხვევებადაც კი აღიქვა და ყურადღება არ გაამახვილო)...
მაგრამ ამ შემთხვევაში საპატრულო პოლიციის მიერ ჩადენილ უსამართლობაზე, მათი უმსგავსო საქციელით გამოწვეულ ჩემს დამცირებასა და პირადი ღირსების შელახვაზეა საუბარი...
მაშინ, როდესაც 2013 წლის 10 სექტემბერს (დაწვრილებით, ნახაზებით და სხვ. აისახა ფეისბუკის ჩემს გვერდზე, აგრეთვე ახალი ამბების სააგენტო "ჯი-ეიჩ-ენი", 12.09.13 http://www.ghn.ge/news-94957.html ):
1. მე ძოწენიძის ქუჩის მოსახვევის (მცირე გზაჯვარედინის) გადაკვეთის მანევრი დასრულებული მქონდა წესების დაცვით.
2. ა/მ „ოპელმა" ბამპერის მარჯვენა კუთხით დაარტყა ჩემი ავტომობილის უკანა მარჯვენა კარს.
3. ავარიის მომხდენმა „ოპელის" მძღოლმა, ჩემს ავტომობილთან შეჯახების შემდეგ თავი ავტომობილი გადაადგილა.
4. პატრული გამოვიძახე (შემდგომ ტელევიზიაშიც დავრეკე).
5. პატრულმა არ შეადგინა უშუალოდ შეჯახების ადგილის ნახაზი.
6. პატრულმა არ მოთხოვა პასუხი „ოპელის" მძღოლს, რომელმაც ჩემ ავტომობილთან შეჯახების შემდეგ საკუთარი ავტომობილს ადგილსამყოფელი შეუცვალა.
7. პატრულმა ნახაზზე ავარიის მომხდენი „ოპელი" ასახა გადაადგილებულ ადგილზე, ანუ იქ, სადაც „ოპელის" მძღოლმა დარღვევით უცვალა ადგილი.
8. პატრული „ოპელის" მძღოლთან ერთად ჩემზე ახდენდა ფსიქოლოგიურ ზეწოლას.
9. ავარიის მომხდენი „ოპელი" (# AEB-163) ეკუთვნის სახელმწიფო მინისტრის აპარატს. მძღოლია როსტომ ვასაძე, რომელიც თავისი უფროსის, სახელმწიფოპ მინისტრის ალექსი პეტრიაშვილის სახელს ჰონორით ახსენებდა...
10. საპატრულო პოლიციამ აქეთ დამაჯარიმა!
მივმართე ლ. სამხარაულის სახელობის სასამართლო ექსპერტიზის ეროვნული ბიუროს, საქართველოში ყველაზე ავტორიტეტულ დამოუკიდებელ დაწესებულებას, რათა ჩაეტარებინა ექსპერტიზა და დაედგინა, თუ ვისი ბრალი იყო ეს საგზაო შემთხვევა. მივიღე ტექნიკური და ადმინისტრაციული წესით გადამოწმებული პასუხი (21.10.2013):
„მოცემული საგზაო-სატრანსპორტო შემთხვევის თავიდან აცილება არ იყო დამოკიდებული შემთხვევაში მონაწილე ავტომობილ „სუძუკი" LOM-344-ის მძღოლის ჰენრი კუპრაშვილის მოქმედებაზე, შესაბამისად მის მოქმედებაში საქართველოს კანონის „საგზაო მოძრაობის უსაფრთხოების შესახებ" მოთხოვნათა უგულველყოფა არ აღინიშნება.
მოცემულ საგზაო სიტუაციაში, საგზაო სატრანსპორტო შემთხვევის თავიდან აცილება დამოკიდებული იყო შემთხვევაში მონაწილე ავტომობილ „ოპელი" AEB-163-ის მძღოლის როსტომ ვასაძის მოქმედებაზე, რომელიც არ შეესაბამება საქართველოს კანონის „საგზაო მოძრაობის უსაფრთხოების შესახებ "საქართველოს კანონის „საგზაო მოძრაობის უსაფრთხოების შესახებ" 28-ე მუხლის მეათე პუნქტის მოთხოვნებს, რომელთა დაცვის შემთხვევაში მოცემული საგზაო-სატრანსპორტო შემთხვევა გამორიცხული იქნებოდა". ხელმოწერები: რ.ლაზარია (ბიუროს უფროსის მოადგილე), დ.გველესიანი, ლ. სიმონიშვილი.
საპატრულო პოლიციას ეს დასკვნა, რომ არ მოეწონა, ავარიიდან ორი თვის შემდეგ(!!!), „მოძებნა გამოსავალი" და თვითონ „ჩაუტარეს ექსპერტიზა" ჩემს მანქანას. უფრო სწორედ, პატარა ზეწოლა განახორციელეს, მირჩიეს მომეკეტა... მანიშნეს, რომ მათთან, მაინც არაფერი გამომივა (გამოგზავნილმა „ექსპერტმა" ჩემი ავტომობილი შეამოწმა, გადაუღო სურათები და თან მითხრა: გირჩევ მძღოლს შეურიგდეო, შესაბამის (საშუალედო!!!) საექსპერტო დასკვნასაც გავაკეთებო, თორემ რა იცი, როგორ წავა საქმე, სასამართლოც რა განაჩენს გამოიტანსო. ვუპასუხე: ჩემთვის მძღოლი მეორე ხარისხოვანია, პრეტენზია მაქვს საპატრულო პოლიციასთან, მის ძალადობასთან, მიკერძოებასა და არაობიექტურობასთან და ბოდიში ხომ მაინც უნდა მომიხადონ მეთქი. წასვლისას ჩაილაპარაკა: მე ჩემი გითხარი და დანარჩენი შენ იციო, თუ აზრს შეიცვლი ორ დღეში დამიკავშირდიო).
სამწუხაროდ, საპატრულო პოლიციის დეპარტამენტმა აინუნშიც არ ჩააგდო ავტორიტეტული ორგანიზაციის ობიექტური დასკვნა და უსინდისოდ ცდილობს თავისი უსამართლობა ძალით გაიტანოს, დაიცვას სახელმწიფო მინისტრის ალექსი პეტრიაშვილის აპარატის და საპატრულო პოლიციის „მუნდირის ღირსება", დღისით-მზისით, უტიფრად გაიძახის შავზე თეთრიაო?!
შემდეგი ეტაპია, სასამართლოში გასაჩივრება 10 დღის ვადაში... და სწორედ აქ დავდექი არჩევანის წინაშე...
ამჟამად, მთლიანად ჩართული ვარ ზამთრის ცურვის მე-9 მსოფლიო ჩემპიონატისთვის (20-23.03.2014, ფინეთი) მზადების პროცესში (ეს იქნება საქართველოს სახელით ქართველი სპორტსმენის ასპარეზობის პირველი შემთხვევა ამ ჩემპიონატების ისტორიაში.). ცხადია, ამ დროს, თუ ვიქნები საპატრულო პოლიციის ძალადობისა და სასამართლოს გაჭიანურებული პროცესების ტყვეობაში (10 სექტემბრიდან ისედაც პატრულის ზეწოლის ქვეშ ვარ), ძალიან გამიჭირდება სათანადოდ (ეს ხომ მსოფლიო ჩემპიონატია!) დავიცვა რეჟიმი და შევძლო შინაგანი მობილიზება, რათა ყოველდღე, ზამთარის სუსხში, ღია აუზის 4 გრადუსიან წყალში და ექსტრემალურ პირობებში ყინულჭრილში ცურვა...
კანონმორჩილი ადამიანი ვარ, ამ შემთხვევამდე პრობლემა არც მქონებია პატრულთან (მანქანას 1977 წლიდან ვატარებ). ამას თუ იმასაც დავუმატებთ, რომ 2013 წელს მომპარეს ღობისათვის განკუთვნილი რკინის მასალა (ვერაფრით მომინელებია), რომელსაც 2005 წლიდან ვაგროვებდი და კარგად მქონდა დაბმულ-შენახული... ყველაფერი ამის შემხედვარე, ნამდვილად აღარ მაქვს ჩემი ოჯახისა და პირადი უშიშროების, ღირსებისა და უფლებების დაცულობის განცდა, უკვე არც პატრულის დანახვა იწვევს ჩემში დადებით ემოციებს...
67 წლისა ვარ და დღემდე:
1. „კგბ"-ემ ვერ „დამაჩმორა" (1967 და 1975 წწ. დაკითხვა)...
2. ქედი არ მომიხრია, როდესაც ოთხმა მეგობარმა რუსეთის კოლონიური რეჟიმის წინააღმდეგ პროტესტის ნიშნად ჩოხები ჩავიცვით და ნახევრად არალეგალური კავშირი შევქმენით 1973 წელს...
3. უკან არ დამიხევია საბჭოთა ხელისუფლების წინააღმდეგ მიმართულ ეროვნული მოძრაობაში, როგორც სახალხო ფრონტელს...
4. ტერიტორიული მთლიანობისათვის ომში არ შევშინებივარ ტყვიებს...
5. არ შევმდრკალვარ, როდესაც მსოფლიოში პირველმა, 3 საათზე მეტხანს, ოთხგან ხელფეხშეკრული 12 კილომეტრი ვიცურე და ვებრძოდი დარდანელის აზვირთებულ ტალღებს...
6. არ მომიხრია ქედი 2004 წელს და ხელისუფლებას სასამართლოში ვუჩივლე, როდესაც 2004 წელს ეროვნული უშიშროების საბჭოდან უკანონოდ გამომიშვეს...
და ახლა... ცდილობენ ვიღაცა სახელისუფლებო ჩინოვნიკების საამებლად, უსინდისოდ, სრულიად უსამართლოდ „გადამიარონ"...
სამწუხაროდ, ამ ეტაპზე, იძულებული ვარ შევწყვიტო ბრძოლა, მათთან ძიძგილაობას ვამჯობინებ ქვეყნისთვისაც ღირსეული საქმე გავაკეთო, შევეჭიდო ზამთრის ცურვის მსოფლიო გრანდებს...
P.S. პატრულის უმსგავსო საქციელი 700 ლარი დამიჯდა... იმის მაგივრად, რომ სახელმწიფო პირიქით მხარში ამომიდგომოდა. თუმცა რა ვიცი, ახლა, ალბათ, შეიძლება სინდისმა შეაწუხოთ და თუ მსოფლიო ჩემპიონობას მოვიპოვებ, ჩემი დანგრეული ავტომობილის მაგივრად, პრიზად ახალი ავტომობილი დამახვედრონ...
P.S. დაზიანებული ავტომობილის შეკეთებას არ ვაპირებ, მსურველს ნებისმიერ დროს შეეძლება ექსპერტიზის ჩატარება...
ჰენრი კუპრაშვილი
საქართველოს ტექნიკური უნივერსიტეტის სრული პროფესორი.
გადამდგარი პირველი კლასის სახელმწიფო მრჩეველი.
პოლიტიკის მეცნიერებათა დოქტორი.
ვიცე-პოლკოვნიკი.
ომის ვეტერანი.
ვახტანგ გორგასლის II ხარისხის ორდენის, „მხედრული მამაცობისათვის" და ბაირონის ოქროს მედლების კავალერი.
წლის ადამიანი - 2002.
1973 წლიდან დავით აღმაშენებლის ჩოხოსანთა კავშირის „ჩოხოსნები - 1973"-ის დამაარსებელი და თავმჯდომარე.
ცურვის ეროვნულ სახეობათა ფედერაციის გენერალური მდივანი.
კაცობრიობის ისტორიაში „მხედრული კოლხურით" (ცურვის ქართული სამხედრო-საწვრთნელი სტილი) დარდანელის სრუტის პირველი დამლაშქრავი (12 კმ., 30.08.2002) და მსოფლიოში სრუტეთა ახალი, კოლხურ-იბერიული სტილით გადაცურვების ფუძემდებელი.
SB11 კატეგორიის მოცურავე ნიკა თვაურის (მსოფლიო ჩემპიონატზე ბრასით სტილით ცურვაში მოიპოვა ბრინჯაოს მედალი - 04.04.2011), ანა ლომინაძის (17 წლისამ „მხედრული კოლხურით" გადაცურა დარდანელის სრუტე - 30.08.2012), ჯიმიკო ბროძელის (11 წლისამ „მხედრული კოლხურით" გადაცურა თბილისის ზღვა - 03.08.2008) მწვრთნელი.
ცნობილი მეტსახელებით: ადამიანი დელფინი, სრუტეთა მბრძანებელი, დარდანელის გმირი, წყლის პრომეთე (მსოფლიო მასმედიის მიერ შერქმეული - ტ/კომპანია სი-ენ-ენი 17.02.01, 05.11.02 და სხვ.).
