23 დეკემბერს 16:00 საათზე საქართველოს პარლამენტის ეროვნული ბიბლიოთეკის ემიგრაციის დარბაზში საქართველოს ელჩი საფრანგეთში ეკატერინე სირაძე-დელონე პროექტის "ლევილის "შატოს" წიგნთსაცავის შესწავლა და კლასიფიცირება" შედეგებს გაეცნობა.
ემიგრანტული გამოცემების ყველაზე სრულყოფილი ფონდი საფრანგეთში, ლევილის "შატოში" დაცული ბიბლიოთეკაა. ამ ფონდის შესწავლის მიზნით განხორციელდა პროექტი "ლევილის "შატოს" წიგნთსაცავის შესწავლა და კლასიფიცირება".
პროექტის ფარგლებში მოწესრიგდა ლევილის „ქართველთა შატოში" წიგნების შესანახად განკუთვნილი სივრცეები. იქ დაცული ფონდიდან შეირჩა კავკასიასა და საქართველოსთან დაკავშირებული რევოლუციამდელი გამოცემები, საქართველოს პირველი რესპუბლიკისა და ქართველი ემიგრანტების მიერ 1920-1980-იან წლებში საქართველოს ფარგლებს გარეთ გამოქვეყნებული ლიტერატურა და პერიოდული გამოცემები. ასევე, შესაძლებელი გახდა წიგნებისა და ჟურნალების გაწმენდა, აღრიცხვა, კატალოგის შედგენა, ეგზემპლარების დანომვრა და „შატოს" მამულის ტერიტორიაზე ბიბლიოთეკისთვის გამოყოფილ შენობაში მათი თანმიმდევრული განთავსება. განსაკუთრებით საინტერესო წიგნები, სტატიები და ფოტომასალა გაციფრდა.
ლევილის „შატოს" მესაკუთრეთა საზოგადოება "ქართულმა კერამ" ეროვნულ ბიბლიოთეკას საჩუქრად გადასცა წიგნები და პერიოდული გამოცემები, რომლებიც ბიბლიოთეკისთვის განსაკუთრებული მნიშვნელობისაა. ეროვნულ ბიბლიოთეკას ასევე საჩუქრად გადაეცა წიგნები ლევილის მამულში მცხოვრებ ემიგრანტთა შთამომავლის ნუცა თაყაიშვილის პირადი ბიბლიოთეკიდან და ეთერ საღირაშვილის მამის დავით საღირაშვილის ბიბლიოთეკა და პირადი არქივი.
საფრანგეთში მოღვაწე მეცნიერმა გიორგი მამულიამ ეროვნულ ბიბლიოთეკას პირადი კოლექციიდან ქართული ემიგრაციის ისტორიის ამსახველი ემიგრანტული პრესის, წიგნადი და ფოტომასალების ბეჭდური და ციფრული ვერსიები გადასცა.
ლევილის „შატოს" წიგნთსაცავში დაცული არქივის მნიშვნელოვანი ნაწილი: პერიოდული გამოცემები, წერილები, პოლიტიკური და მხატვრული ლიტერატურა უკვე საქართველოს პარლამენტის ეროვნულ ბიბლიოთეკაში ინახება. უნიკალური არქივები - ირაკლი წერეთლისა და ივანე ზურაბიშვილის ნაშრომები, დავით საღირაშვილის წერილები, საქართველოს ემიგრანტული მთავრობის მიერ საერთაშორისო ორგანიზაციებისადმი მიწერილი ოფიციალური დოკუმენტები - ეროვნული ბიბლიოთეკის ემიგრაციის დარბაზში განთავსდა.
პროექტის ინიციატორები იყვნენ საქართველოს პარლამენტის ეროვნული ბიბლიოთეკა, საქართველოს კულტურისა და ძეგლთა დაცვის სამინისტრო, საქართველოს საელჩო საფრანგეთში. პროექტი განხორციელდა "Mount Holyoke College", "South Hadley", სამოქალაქო საზოგადოება „ქართული კერისა'' და ნოე ჟორდანიას სახელობის ინსტიტუტის მხარდაჭერით. ფონდის დამუშავებაში ეროვნული ბიბლიოთეკის თანამშრომლები მონაწილეობდნენ.
ეროვნულ ბიბლიოთეკაში დაცული ლევილის "შატოს" უნიკალური მასალების გამოფენა უახლოეს მომავალში იგეგმება. მასზე მოწვეულნი იქნებიან ქალბატონი ირენ ციციშვილი, ორგანიზაცია "ქართული კერისა" და ნოე ჟორდანიას ინსტიტუტის წარმომადგენლები.
მასალის გამოყენების პირობები