საქართველოს ადგილობრივი თვითმმართველობის ეროვნული ასოციაცია დედაქალაქის მერის გიგი უგულავასთვის უფლებამოსილების შეჩერების გამო შეშფოთებას გამოთქვამს და იმედს გამოთქვამს, რომ ზიანი არ მიადგება სახელმწიფოს ფუნდამენტურ ინტერესებს.
საქართველოს ადგილობრივი თვითმმართველობის ეროვნული ასოციაციის განცხადებას „ჯი-ეიჩ-ენი" უცვლელად გთავაზობთ:
საქართველოს ადგილობრივი თვითმმართველობის ეროვნული ასოციაცია შეშფოთებულია საქართველოს ადგილობრივი თვითმმართველობის ერთ-ერთ უმნიშვნელოვანეს სტრუქტურაზე განხორციელებული ზეწოლით. მაშინ როდესაც საქართველოს ადგილობრივი თვითმმართველობის არჩევნებამდე დარჩენილია რამდენიმე თვე, სასამართლოს მიერ ქ. თბილისის პირდაპირი წესით არჩეული მერის, რომელიც ასევე ხელმძღვანელობს საქართველოს დელეგაციას ევროპის საბჭოს ადგილობრივი და რეგიონალური ხელისუფლებების კონგრესში, უფლებამოსილების შეჩერება წარმოადგენს სერიოზულ ზეწოლას აღნიშნულ თვითმმართველობის სტრუქტურაზე.
საქართველოს ადგილობრივი თვითმმართველობის ეროვნული ასოციაცია იმედს გამოთქვავს, რომ ზემდგომი ინსტანციის სასამართლო ჯეროვნად გაითვალისწინებს როგორც საქართველოს კანონამდებლობას, ასევე საქართველოს მიერ ნაკისრ საერთაშორისო ვალდებულებებს, მათ შორის ევროპის ადგილობრივი თვითმმართველობის ქარტიის დებულებებს და ძალაში არ დატოვებს პირველი ინსტანციის სასამართლოს მიერ მიღებულ გადაწყვეტილებას.
საქართველოს დემოკრატიულ სახელმწიფოდ ჩამოყალიბების ერთ-ერთ უმნიშვნელოვან სტადიაზე ვიმყოფებით და გვჯერა, რომ საქართველოს თითოეულმა მოქალაქემ, ხელისუფლების ყველა შტომ და სამოქალაქო სექტორმა ყველაფერი უნდა გავაკეთოთ რათა ხელიდან არ გავუშვათ ეს ისტორიული შესაძლებლობა და ზიანი არ მივაყენოთ ჩვენის სახელმწიფოს ფუნდამენტურ ინტერესებს.
