დღეს, 21 დეკემბერს 14:30 საათზე რუსთაველის გამზირზე, „ერთიანი ნაციონალური მოძრაობისა" და საზოგადოების სხვადასხვა ჯგუფების ინიციატივით უკრაინის ევროპული არჩევანის მხარდასაჭერი აქცია გაიმართება.
„ერთიანი ნაციონალური მოძრაობის" ერთ-ერთი ლიდერის გიორგი კანდელაკის განმარტებით, "ერთიანი ნაციონალური მოძრაობა" უერთდება საზოგადოების მრავალი ჯგუფის განწყობას იმასთან დაკავშირებით, რომ უკრაინელ ერს გამოვუცხადოთ თანადგომა იმ ზეწოლის პირობებში რომელსაც იგი განიცდის რუსეთის ფედერაციის მხრიდან, რათა უკრაინამ უარი თქვას ევროპულ მომავალზე.
„სიმბოლურია, რომ ეს მოვლენები ემთხვევა საბჭოთა კავშირის დაშლის საკვანძო დღეებს. სწორედ ახლა, ჩვენ ვხედავთ უკრაინის უკან, საბჭოთა სივრცეში შეთრევის მცდელობას. ამ გადამწყვეტ მომენტში, ჩვენ ვალდებულნი ვართ გვერდში დავუდგეთ უკრაინელ ხალხს, მათ შორის იმიტომაც რომ უკრაინა საქართველოს გვერდზე დადგა 2008 წლის აგვისტოს რუსეთის აგრესიის დროს.
სწორედ ამიტომ, ერთიანი ნაციონალური მოძრაობა, საზოგადოების სხვადასხვა ჯგუფებთან ერთად, 14:30 საათზე რუსთაველის გამზირზე მოაწყობს უკრაინის ევროპული არჩევანის მხარდასაჭერ აქციას.
დღეს უკრაინაში საქართველოს ბედიც წყდება, რადგანაც უკრაინის ევრაზიული პროექტში ძალმომრეობით შეთრევის არდაშვება ბევრად გააადვილებს მრავალი თაობის ჩვენი თანამემამულის ოცნების - ევროპული და თავისუფალი საქართველოს - ერთხელ და სამუდამოდ ახდენას"- აღნიშნა კანდელაკმა.
