თბილისში, გარდაბნის გზატ. # 6-ში, 50 დევნილ ოჯახს, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ ახალი ბინების გასაღებები გადასცა.
ყოფილი 74-ე სკოლის შენობას დევნილთა სამინისტრომ სარეაბილიტაციო სამუშაოები ჩაუტარა და საცხოვებლად გადააკეთა.
„კიდევ 50-მა დევნილმა ოჯახმა მიიღო თავისი მუდმივი საცხოვრებელი ბინა, რომელსაც რეაბილიტაცია სამინისტრომ ჩაუტარა. ახალი წლის დადგომამდე კიდევ რამდენიმე ასეულ ოჯახს საახალწლო საჩუქარს გავუკეთებთ. მინდა მადლობა გადავუხადო ყველას, ვინც მონაწილეობა მიიღო ამ საქმეში, ასევე შ.პ.ს „ბარამბოს", რომელმაც საჩუქრები გაუკეთა დევნილებს. ყველას ვულოცავ ახალმოსახლეობას, დამდეგ შობა-ახალ წელს და ვუსურვებ ბედნიერებას, სიკეთეს და წარმატებებს" - განაცხადა მინისტრმა დავით დარახველიძემ.
აღნიშნულ შენობაში საცხოვრებელი ფართის მისაღებად სულ 140 განაცხადი შემოვიდა, რომელთაგან საბოლოოდ 50 ოჯახი შეირჩა.
შესახლებამდე ერთი დღით ადრე დევნილთა სამინისტროში ბინები ფარული კენჭისყრის პრინციპით განაწილდა. კენჭისყრის მიხედვით გამოვლინდა, თუ ვინ რომელ სართულზე მიიღებს საცხოვრებელ ფართს. 4 სართულიან შენობაში სულ 50 ბინაა, აქედან 19 ერთ ოთახიანი, 27 ორ ოთახიანი და 4 სამ ოთახიანი.
აღნიშნულ შენობაში სარემონტო სამუშაოები ტენდერში გამარჯვებულმა შპს „აგრომშენსერვისმა" განახორციელა. სარეაბილიტაციო სამუშაოების სატენდერო ღირებულება 892 500 ლარს შეადგენდა. მშენებლობაზე 25 დევნილი იყო დასაქმებული.
დევნილ ოჯახებს შპს „ბარამბომ" საახალწლო საჩუქრად ტკბილეული გადასცა.
ღონისძიებას ესწრებოდნენ დევნილთა მინისტრი დავით დარახველიძე, მინისტრის მოადგილე მერაბ მენაბდე, ისნის რაიონის მაჟორიტარი დეპიტატი ალექსანდრე ქანთარია და შპს „აგრომშენსერვისის" დირექტორი დავით კანკავა.
