"ალიანსი საქართველოსთვის" წარმომადგენელი, "რესპუბლიკელი" დავით ბერძენიშვილი პრაიმერის ჩატარების იდეის სოციოლოგიური გამოკითხვით ჩანაცვლებას ირაკლი ალასანიას გადაწყვეტილებას უკავშირებს.
"პრაიმერის იდეა თავიდანვე მკვდარი იყო და დამთავრდა ისევე, როგორიც დაიბადა. პრაიმერის ინიციატორმა პარტიებმა კბილი მოგვისინჯეს, მაგრამ რაკი დაინახეს, რომ არაფერი გამოუვიდათ, უარი თქვეს საკუთარ მკვდრადშობილი იდეის განხორციელებაზე", - განუცხადა "ჯი-ეიჩ-ენს" დავით ბერძენიშვილმა
ამასთან, მისივე განმარტებით, "ალიანსმა" "აქტიურად იზრუნა იმაზე", რომ ირაკლი ალასანიას პრაიმერში მონაწილეობა არ მიეღო და ეს იდეაც, ისე როგორც მისი ინიციატორი ზურაბ ნოღაიდელის "არსებობა ქართულ პოლიტიკაში დამთავრებულიყო".
"ნოღაიდელის ფაქტორი ხელისუფლებამ ხელოვნურად შექმნა და მისი ოპონენტების წინააღმდეგ გათამაშება მოინდომა, მაგრამ "ალიანსმა" ძალიან მნიშვნელოვანი როლი შეასრულა, რომ ნოღაიდელის ფაქტორი მომსპარიყო. დღეს უკვე ნოღაიდელი, თავისი პრაიმერის იდეით აღარ არსებობს ქართულ პოლიტიკაში და სწორედ ჩვენ და ქართულმა საზოგადოებამ იზრუნა აქტიურად იმაზე, რომ ნოღაიდელი, რომელიც ხელისუფელებამ ფსევდოოპონენტად, იგორ გიორგაძის და ალსან აბაშიძის ფუნქციით მოგვივლინა, არ განიხილებოდეს როგორც რაიმე ტიპის ფაქტორი", - განუმარტა ბერძენიშვილმა "ჯი-ეიჩ-ენს".
შეგახსენებთ, რომ მერობის ერთიანი ოპოზიციური კანდიდატების გამოსავლენად პრაიმერი აღარ გაიმართება. პრაიმერის ინიციატორი პარტიების ლიდერებმა ახალი გადაწყვეტილების შესახებ ოფიციალურად დღეს განაცხადეს და განმარტეს, რომ მერობის კანდიდატების გამოვლენა სოციოლოგიური გამოკითხვით მოხდება.
აღსანიშნავია, რომ აღნიშნულ გადაწყვეტილებას წინ უძღვოდა პრაიმერში მონაწილეობის მიღებაზე უარის თქმასთან დაკავშირებით პრაიმერის ინიციატორ პარტიებთან ერთად შესაბამის კონსულტაციებში მონაწილე, "ალიანსი საქართველოსთვის" ერთი კვირით გამიჯნული ლიდერის - ირაკლი ალასანიას გადაწყვეტილება.
