ჟურნალ "კომერსანტ-ვლასტთან" საუბარში საქართველოს პრეზიდენტი მიხეილ სააკაშვილი აცხადებს, რომ საქართველო აფხაზეთისა და სამხრეთ ოსეთის მოსახლეობას თავის მოქალაქეებად მიიჩნევს.
"მთელმა მსოფლიომ იცის, რომ ეს ტერიტორიები ოკუპირებულია სხვა სახელმწიფოს მიერ, ამიტომაც არანორმალური ჩავესისა და გაჭირვებაში მყოფი ნაურუს გარდა ისინი არავის უღიარებია. ნიკარაგუას პარლამენტმაც კი არ მოახდინა ამ აღიარების რატიფიცირება, იმიტომ რომ ორტეგას პარლამენტართა შორის ბევრია გონიერი ადამიანი", _ აცხადებს მიხეილ სააკაშვილი და დასძენს, რომ საქართველოს მოლაპარაკებები აქვს ეკვადორთანაც და კუბასთანაც და ორივე ეს ქვეყანა აცხადებს, რომ აფხაზეთისა და ე.წ. სამხრეთ ოსეთის აღიარება საერთაშორისო სამართლის უხეში დარღვევაა.
მიხეილ სააკაშვილი ასევე აცხადებს, რომ საქართველო არასოდეს გამოიყენებს ძალას აფხაზეთსა და სამხრეთ ოსეთში მაცხოვრებელი საკუთარი მოქალაქეების წინააღმდეგ.
