ხვალ, 26 თებერვალს, აშშ-ის ეკონომიკისა და ბიზნესის საქმეთა მდივნის თანაშემწე ხოსე ფერნანდესი საქართველოში ვიზიტს დაასრულებს.
აშშ-ის საელჩოს ინფორმაციით, აშშ-ის სამთავრობო დელეგაცია ხოსე ფერნანდესის ხელმძღვანელობით მონაწილეობს ეკონომიკის სამუშაო ჯგუფის შეხვედრაში, რომელიც აშშ-საქართველოს სტრატეგიული თანამშრომლობის ქარტიის ფარგლებში იმართება. სამუშაო ჯგუფის შეხვედრისას მხარეები ეკონომიკასა და ბიზნესთან დაკავშირებულ საკითხებს განიხილავენ. ამერიკის სავაჭრო-სამრეწველო პალატის მიერ გამართულ ღონისძიებაზე, ფორმდება აშშ-საქართველოს შეთანხმება ენერგეტიკული ინფრასტრუქტურის განვითარების საქმეში თანამშრომლობის შესახებ.
აშშ-საქართველოს სტრატეგიული თანამშრომლობის ქარტიას 2009 წლის იანვარში, ვაშინგტონში მოეწერა ხელი. 2009 წლის ივნისში სტრატეგიული თანამშრომლობის კომისიის პირველ სხდომაზე ქარტიის პირობების შესასრულებლად შეიქმნა ოთხი სამუშაო ჯგუფი - დემოკრატიის, უსაფრთხოების, ეკონომიკური განვითარებისა და ხალხთა შორის ურთიერთობის საკითხებში. დღევანდელი ვიზიტით სრულდება სამუშაო ჯგუფების შეხვედრათა პირველი რაუნდი, რომელსაც საქართველომ უმასპინძლა.
ფერნანდესი საქართველოს 24 თებერვალს ესტუმრა.
