ქალაქ ამანში საქართველო-იორდანიას შორის პოლიტიკური კონსულტაციების პირველი რაუნდი გაიმართა. როგორც "ჯი-ეიჩ-ენს" საგარეო უწყებიდან აცნობეს, საქართველოს მხრიდან დელეგაციას მინისტრის მოადგილე ალექსანდრე ნალბანდოვი ხელმძღვანელობდა.
შეხვედრები გაიმართა იორდანიის ჰაშიმიტური სამეფოს საგარეო საქმეთა მინისტრ ნასერ ჯუდესთან, საგარეო საქმეთა სამინისტროს გენერალურ მდივან მუჰამედ ალი სირაჯისთან და ევროპულ საქმეთა დეპარტამენტის დირექტორ ბაშერ ზოუბისთან.
ვიზიტის ფარგლებში ხელი მოეწერა საგარეო საქმეთა სამინისტროებს შორის თანამშრომლობის ოქმს.
შეხვედრები გაიმართა ასევე სენატის თავმჯდომარე ტაჰერ ამ მასრთან, პარლამენტის საგარეო კომიტეტის თავმჯდომარე ფაიზალ ალ ფაიეზთან და საჯარო სექტორის განვითარებისა და მეგაპროექტების სახელმწიფო მინისტრ იმად ნაჯიბ ფახურისთან.
მხარეებმა განიხილეს ორ ქვეყანას შორის ორმხრივი ურთიერთობების გაღრმავებისა და მრავალმხრივ ფორმატებში თანამშრომლობის განვითარების კონკრეტული გზები და პერსპექტივები; იმსჯელეს რეგიონალური პრობლემების თაობაზე და ერთმანეთს გაუზიარეს ხედვა მათ გადაჭრასთან დაკავშირებით. იორდანიის მხარემ კვლავ დაადასტურა საქართველოს სუვერენიტეტისა ტერიტორიული მთლიანობის მხარდაჭერა.
ორმხრივი თანამშრომლობის შემდგომი განვითარების შესაძლებლობების განხილვისას განსაკუთრებული ყურადღება დაეთმო საქართველოს პრემიერ-მინისტრის შესაძლო ვიზიტს იორდანიის ჰაშიმიტურ სამეფოში 2010 წლის მარტში. მხარეებმა ხაზი გაუსვეს მაღალი დონის გაცვლითი ვიზიტების ორგანიზების მნიშვნელობას და ამისთვის მზადყოფნა გამოხატეს.
