"ალიანსის საქართველოსთვის" ლიდერის ირაკლი ალასანიას განცხადებით, საქართველოს ხელისუფლების მიმართ საერთაშორისო საზოგადოების დამოკიდებულება რადიკალურად შეცვლილია.
როგორც ალასანიამ დღეს გამართულ პრესკონფერენციაზე განაცხადა, აღნიშნულის საფუძველს მიუნხენის კონფერენციის ფარგლებში გამართული შეხვედრების დროს საერთაშორისო ორგანიზაციების მხრიდან დაფიქსირებული პოზიცია აძლევს.
"მიუნჰენის კონფერენციის ფარგლებში მომეცა შესაძლებლობა, ევროკავშირისა და აშშ-ის სახელმწიფო დეპარტამენტის მაღალჩინოსნებს პირისპირ შევხვედროდი. აღნიშნული შეხვედრებიდან გამომდინარე, შემიძლია, თამამად ვთქვა, რომ საერთაშორისო საზოგადოების დამოკიდებულება საქართველოს ხელისუფლების მიმართ რადიკალურად შეცვლილია. ჩვენი ქვეყნის სტრატეგიული პარტნიორები - ევროკავშირი და აშშ საქართველოს ხელისუფლებისგან დაპირებული დემოკარატიული რეფორმების გატარებას და ადგილობრივი არჩევნების დემოკრატიულად ჩატრებას მოითხოვენ", - განაცხადა ალასანიამ.
მისივე განმარტებით, დასავლეთთან აქტიური ურთიერთობა და სწორად წარმართული საგარეო პოლიტიკა საქართველოსთვის სასიცოცხლოდ მნიშვნელოვანია.
შეგახსენებთ, რომ ირაკლი ალასანია ერთადერთი ქართველი ოპოზიციონერი იყო, რომელიც მიუნჰენის უსაფრთხოების 46-ე კონფერენციაზე იყო მიწვეული.
