საქართველოს ვიცე-პრემიერმინისტრ გიორგი ბარამიძის მტკიცებით, ცივილიზებული სამყარო აფხაზეთისა და ე. წ. სამხრეთ ოსეთის დამოუკიდებლობას არასდროს აღიარებს.
"ეს არასდროს მოხდება, მიუხედავად იმისა, რომ რუსეთისა და მარიონეტული რეჟიმების მხრიდან მუდმივად გაგრძელდება მცდელობა, კონფლიქტური რეგიონების აღიარების ლეგიტიმაცია მოახდინონ. შეიძლება, აფხაზეთისა და ცხინვალის დამოუკიდებლობა, რუსეთის ქრთამებით, ნაურუს მსგავსმა ერთმა-ორმა სახელმწიფომაც აღიაროს, მაგრამ ეს საერთაშორისო ასპარეზზე ვერაფერს შეცვლის", - ასე ეხმიანება ბარამიძე აფხაზეთის დე-ფაქტო საგარეო საქმეთა სამინისტროს მიერ თანამშრომლობასთან დაკავშირებით რამდენიმე საერთაშორისო ორგანიზაციისთვის მიმართვას.
"მარიონეტული რეჟიმები ასეთ მიმართვებს პერიოდულად ახორციელებენ და ალბათ, ეს გაგრძელდება, მაგრამ საქართველოს მეგობრების თანადგომით, საერთაშორისო თანამეგობრობა თანამშრომლობის შესახებ საოკუპაციო მარიონეტული რეჟიმების უსაფუძვლო თხოვნის დაკმაყოფილებაზე უარს ამბობს", - განუცხადა აღნიშნულ საკითხზე კომენტირებისას ბარამიძემ ჟურნალისტებს.
