კოალიცია "ქართული ოცნების" ერთ-ერთი ლიდერი თინა ხიდაშელი საგარეო საქმეთა სამინისტროსგან სადამკვირვებლო მისიებისთვის გაგზავნილი ოფიციალური წერილების გამოქვეყნებას ითხოვს. ამის შესახებ ხიდაშელმა ჟურნალისტებთან საუბრისას განაცხადა.
"მინდა საგარეო საქმეთა სამინისტროს მივმართო და მოვითხოვო, როგორც საქართველოს მოქალაქემ და პოლიტიკურ პროცესებში ჩართულმა ერთ-ერთი პოლიტიკური სუბიექტის წარმომადგენელმა, გამოაქვეყნოს ოფიციალური მოწვევის ტექსტები, რომელიც გაუგზავნეს საერთაშორისო ორგანიზაციებს, როგორც ეუთოს ასევე სხვა სადამკვირვებლო ორგანიზაციებს, მათ შორის ევროკავშირს და ა.შ", _ განაცხადა ხიდაშელმა.
მისი თქმით, ძალიან მნიშვნელოვანია ქართველმა ხალხმა იცოდეს, თუ რა ტიპის მოსაწვევები გაეგზავნათ საერთაშორისო ორგანიზაციების წარმომადგენლებს.
"ეს არის ძალიან მნიშვნელოვანი, რომ კიდევ ერთხელ ხელისუფლებამ შეცდომაში არ შეიყვანოს ქართული საზოგადოება",_ განაცხადა კოალიცია "ქართული ოცნების" ერთ-ერთმა ლიდერმა.
