თბილისის მერმა გიგი უგულავამ გლდანის მე-6 მ/რაიონში 600 კვ.მეტრ ფართობზე, ახალი ორსართულიანი მრავალფუნქციური კომერციული ობიექტი დაათვალიერა და იქ დასაქმებულ ადამიანებს შეხვდა.
შენობის პირველ სართულზე დღეს სუპერმარკეტი გაიხსნა, რომელიც ადგილობრივ მოსახლეობას 24 საათის განმავლობაში სხვადასხვა სახეობის პროდუქციასა და მაღალი დონის მომსახურებას შეთავაზებს. მაღაზიაში 20 ადგილობრივი მოსახლე დასაქმდა. თანამშრომელები სავაჭრო ობიექტში მთლიანად მერიის დასაქმების მსურველთა ბაზიდან შეირჩა.
მრავალფუნქციური კომერციული ცენტრი უახლოეს მომავალში სრულად დაიტვირთება. იგეგმება პურის საცხობის, სამკერვალო სალონის, საოჯახო ქიმიის მაღაზიისა და სხვადასხვა კომერციული თუ საყოფაცხოვრებო დანიშნულების ობიექტის გახსნა, სადაც მერიის დასაქმების ბაზიდან დამატებით 30-მდე თბილისელი დასაქმდება.
თბილისის მერიის ერთ-ერთი მთავარი პრირიტეტი ქალაქში მიმზიდველი ბიზნესგარემოს შექმნა, ინვესტიციების მოზიდვა და კერძო სექტორის მხარდაჭერაა, რაც ახალი სამუშაო ადილების შექმნასა და თბილისელების დასაქმებას უწყობს ხელს.
დასაქმების მსურველთა ბაზა მერიაში წელიწადზე მეტია რაც ფუნქციონირებს და ქალაქის 30 მუნიციპალიტეტში არსებულ დასაქმების მსურველთა მონაცემებს აერთიანებს. ნებისმიერ მსურველს შესაძლებლობა აქვს, სახლთან ახლოს რაიონულ მუნიციპალიტეტში მივიდეს და ბაზაში მხოლოდ პირადობის მოწმობით დარეგისტრირდეს. თბილისის მერია თანამშრომლობს კერძო სექტორთან და მერიის დასაქმების პროექტში მონაწილე პირებს მუშაობის დაწყებაში ეხმარება. პროექტის ფარგლებში უკვე ასობით თბილისელი დასაქმდა.
