თბილისის საქალაქო სასამართლომ ამჟამად ძებნაში მყოფი 26 წლის დავით ონიკაური დამნაშავედ სცნო და დანაშაულთა ერთობლიობით, სასჯელთა ნაწილობრივი შეკრების პრინციპით 30 წლის ვადით თავისუფლების აღკვეთა განუსაზღვრა.
დავით ონიკაურს ბრალად ედებოდა განზრახ მკვლელობის მცდელობა, ორი ან მეტი პირის მიმართ; განზრახ მკვლელობა; განზრახ მკვლელობის მცდელობა, ჩადენილი ხულიგნური ქვენაგრძნობით და არაერთგზის; ასევე, ცეცხლსასროლი იარაღისა და საბრძოლო მასალის მართლსაწინაარმდეგო შეძენა, შენახვა და ტარება.
მსჯავრდებულის მიმართ სასჯელის ვადის ათვლა მისი თავისუფლების აღკვეთის მომენტიდან დაიწყება.
საქმის მასალების მიხედვით, წარსულში ძარცვისა და მკვლელობის მცდელობისთვის ნასამართლევმა დავით ონიკაურმა, 2004 წლის 9 ნოემბერს, ვაშლიჯვრის დასახლებაში მდებარე ,,პოკერ კლუბთან" მომხდარი ურთიერთშელაპარაკების ნიადაგზე, შურისძიების მოტივით, მის მიერ უკანონოდ შეძენილი ცეცხლსასროლი იარაღით, განზრახ მოკვლის მიზნით განახორციელა რამდენიმე გასროლა ირაკლი ხ.-ს, ირაკლი ჯ.-ს, გიორგი კ.ს და ლევან ნ.-ს მიმართ. სროლის შედეგად სხეულის დაზიანებები მიიღეს გიორგი კ.-მ და ლევან ნ.-.მ, ხოლო დავით ონიკაური შემთხვევის ადგილიდან მიიმალა. მიღებული ჭრილობების შედეგად ლევან ნ. საავადმყოფოში მიყვანისთანავე გარდაიცვალა.
გარდა აღნიშნულისა, 2011 წლის აპრილის თვეში, დავით ონიკაურმა განიზრახა თავისი ნაცნობის, ბიძინა ქ.-ს მკვლელობა. განზრახვის სისრულეში მოყვანის მიზნით, მან კვლავ გამოიყენა მის მიერ წარსულში უკანონოდ შეძენილი ცეცხლსასროლი იარაღი და ამავე წლის 14 აპრილს, დიღმის მასივში მდებარე ე.წ. ,,ალეას" სკვერში თავს დაესხა ბიძინა ქ.-ს. დ. ონიკაურმა ყოველგვარი მოტივის გარეშე, ხულიგნური ქვენა გრძნობით, დაზარალებულის მიმართულებით რამოდენიმე გასროლა განახორციელა და ბიძინა ქ.-ს სხეულის სხვადასხვა ადგილას მრავლობითი ჭრილობები მიაყენა. დანაშაულის ჩადენის შემდეგ დავით ონიკაური შემთხვევის ადგილიდან მიიმალა. მამაკაცი დროულად იქნა გადაყვანილი ღუდუშაურის სახელობის კლინიკაში, სადაც მისი სიცოცხლის გადარჩენა მოხერხდა.
საქმეზე ჩატარებული ბალისტიკური ექსპერტიზით დადასტურდა, რომ ორივე შემთხვევაში, როგორც შემთხვევის ადგილიდან, ასევე დაზარალებულის ორგანიზმიდან ამოღებული ვაზნები გასროლილია ერთი და იგივე ცეცხლსასროლი იარაღიდან, ხოლო ბრალდებულის საცხოვრებელი ბინიდან ამოღებული ვაზნები ვარგისია სროლისთვის და მიეკუთვნება საბრძოლო მასალათა კატეგორიას.
