მიუნხენის კონფერენციაზე ქართული და რუსული დელეგაციების შეხვედრა გაიმართა, - ამის შესახებ დრეს გამართულ ტრადიციულ ბრიფინგზე "ქართული ოცნების" პრესსპიკერმა მაია ფანჯიკიძემ განაცხადა. მისი თქმით, შეხვედრაზე რუსეთის მხრიდან იმყოფებოდა სერგეი ივანოვი, საქართველოს მხრიდან კი პროსახელისუფლებო ექსპერტები. ფანჯიკიძის ინფორმაციით, შეხვედრას ასევე ესწრებოდნენ უცხელი მეთვალყურეებიც.
"როგორც სარწმუნო წყარო იუწყება, ამ შეხვედრას ძალიან თბილ და მეგობრულ ატმოსფეროში ჩაუვლია. ძალიან კარგია, თუკი რაღაც სახით რუსეთთან დიალოგის აღდგენაზე მუშაობა ხდება, მაგრამ უკეთესი იქნებოდა, რომ ამ ფორმატში სხვა ექსპერტებთან ერთად მონაწილეობა მიეღოთ საზოგადოების წარმომადგენლებსაც და დამოუკიდებელ ექსპერტებსაც. ამ შეხვედრის შემდეგ კარგი იქნებოდა ქართულ საზოგადოებას გაეგო თუ რისთვის ტარდება, რა მიზნები აქვს და რა შედეგები მოაქვს ამ შეხვედრებს", - განაცხადა ფანჯიკიძემ.
მისივე თქმით, ამავე კონფერენციის ხელმძღვანელობამ საქართველოს საგარეო საქმეთა მინისტრის მოადგილე თორნიკე გორდაძე დასაჯა.
"საქართველოს პრეზიდენტის გამოსვლის კომენტირებისას საგარეო საქმეთა მინისტრის მოადგილე თორნიკე გორდაძემ იმ სხდომის წამყვანი, რომელშიც მონაწილეობდა სააკაშვილი, დაადანაშაულა საქართველოს პრეზიდენტის დაუპატიჟებელ სტუმრად მოხსენიებაში. გორდაძემ აღნიშნა, რომ ეს იყო ამ სხდომის წამყვანის, იოზეფ იოფეს შეცდომა რისთვისაც იგი კონფერენციის ხელმძღვანელობამ დასაჯა. გორდაძემ იქვე განმარტა, რომ სააკაშვილი ერთი კვირით ადრე იყო შეყვანილი გამომსვლელთა სიაში. იოზეფ იოფე გერმანიაში ძალიან ცნობილი, პრესტიჟული გაზეთის DIE CEIT-ს ის რედაქტორია. მან ამ ინციდენტზე სრულიად სხვაგვარი კომენტარი გააკეთა. იგი ამბობს, რომ სააკაშვილი მას არც გაუთვალისწინებელ და არც დაუპატიჟებელ სტუმრად არ მოუხსენებია. მან მას უწოდა მოულოდნელი სტუმარი, რადგან სააკაშვილი არ ყოფილა მიწვეული კონფერენციაზე და მხოლოდ უკანასკნელ მომენტში ჩასვეს გამომსვლელთა სიაში. იოფე ამბობს: "ვფიქრობ, მიუნხენის კონფერენციის ორგანიზატორები ისე იყვნენ შეზღუდული დროში, რომ მათ ვერ გამოუყვეს სააკაშვილს ცალკე სასაუბრო დრო და ამიტომ ჩართეს ჩემს პანელში". იოზეფ იოფე საქართველოს საგარეო საქმეთა მინისტრის მოადგილის, თორნიკე გორდაძის ბრალდებას შეურაცხყოფაზე უარესს უწოდებს და მიიჩნევს, რომ გორდაძემ ურცხვად გამოიყენა მისი პიროვნება საქართველოს შიდა პოლიტიკურ წინასაარჩევნო ვითარებაში ნაციონალების შანსების გასაზრდელად", - განაცხადა ფანჯიკიძემ.
ფანჯიკიძისვე თქმით, პრეზიდენტმა სიტყვით გამოსვლისას ისაუბრა ტუნისელ მოქალაქეზე, რომელმაც თავი დაიწვა. პრესსპიკერის განცხადებით, ეს სააკაშვილის მხრიდან უხერხულია, რადგან საქართველოშიც მოხდა მსგავსი რამ.
"ცოტა უხერხულია, რომ არაბული გაზაფხულის პანელზე, რომელზეც საქართველოს პრეზიდენტი სიტყვით გამოვიდა, მიხეილ სააკაშვილს მაგალითად მოჰყავს ტუნისელი მოქალაქის თავგანწირული ქცევა მისი თავის დაწვის ამბავი, რომელმაც დასაბამი მისცა ტუნისელი ხალხის მასობრივ მღელვარებას და გამოიწვია არაბული გაზაფხული. ამავე დროს საქართველოს პრეზიდენტს ავიწყდება, რომ 2010 წლის 27 ოქტომბერს ხელისუფლებისგან შეურაცხყოფილმა და სასოწარკვეთაში ჩავარდნილმა სოხუმიდან დევნილმა ნანა ფიფიამ თავი დაიწვა ლტოლვილთა და განსახლების სამინისტროს წინ და ამ შემთხვევაში ხელისუფლების მხრიდან არ მოყოლია არანაირი კომენტარი, როგორც გაკეთდეა მიუნხენის კონფერენციაზე", - აღნიშნა ფანჯიკიძემ.
