მიუხედავად მცდელობებისა, პოლიტიკური პარტია "ქართული ოცნება - დემოკრატიული საქართველოს" საინიციატივო ჯგუფმა საზოგადეობაში დადებითი რეაქცია გამოიწვია. ამის შესახებ დღეს გამართულ ტრადიციულ ბრიფინგზე "ქართული ოცნების" პრესსპიკერმა მაია ფანჯიკიძემ განაცხადა.
"გასულ კვირას ბიძინა ივანიშვილმა წარადგინა პოლიტიკური პარტია "ქართული ოცნების" საინიციატივო ჯგუფი. ეს წარდგენა საკმაოდ ფართოდ გაშუქდა ქართულ მედიაში. მიუხედავად იმისა, რომ იყო მცდელობა უარყოფითად წარმოედგინათ ბატონი ბიძინას მიერ დასახელებული გუნდი, საზოგადოებაში ამ გუნდის დასახელებამ ძალიან დადებითი რეაქცია გამოიწვია", - განაცხადა ფანჯიკიძემ.
მისი თქმით, უახლოეს მომავალში საქართველოს მთელი მასშტაბით ამოქმედდება რეგიონალური ოფისები და "ქართული ოცნების" მხარდამჭერებს რეგიონებშიც ექნებათ საშუალება, რომ მივიდნენ, გამოხატონ თავიანთი პოზიცია.
"მათ მიეცემათ შესაძლებლობა იაქტიურონ იმ საერთო საქმისთვის, რომელსაც ემსახურება ბიძინა ივანიშვილის პოლიტიკური პარტიის შექმნა", - აღნიშნა ფანჯიკიძემ.
ბიძინა ივანიშვილმა საინიციატივო ჯგუფი გასულ კვირას წარადგინა. შეგახსენებთ, რომ საინიციატივო ჯგუფში იქნებიან: ჟურნალისტი ელისო ჩაფიძე, საერთაშორისო საქველმოქმედი ფონდ "ქართუს" ექს-პრეზიდენტი ირაკლი ღარიბაშვილი, ადვოკატი არჩილ კბილაშვილი, მწერალი გურამ ოდიშარია, მათემატიკოსი ივანე კიღურაძე, მსახიობი ნინელი ჭანკვეტაძე, ექსპერტი უსაფრთხოების საკითხებში ირაკლი სესიაშვილი, ზურაბ ჟვანიას ძმა და ბიზნესმენი გიორგი (გოგლა) ჟვანია, იურისტი თამაზ აბდალიანი, ადამიანის უფლებათადამცველი მანანა კობახიძე, ფეხბურთელი კახი კალაძე, ექსპერტი ნოდარ ხადური, ყოფილი საგარეო საქმეთა მინისტრი თედო ჯაფარიძე, ექსპერტი გიორგი ვოლსკი, ყოფილი სპორტსმენი ლერი ხაბელოვი, მეცნიერი ნუგზარ დავითაშვილი, იურისტი ზაქარია ქუცნაშვილი და საზოგადოებრივი მოძრაობა "ქართული ოცნების" პრესსპიკერი მაია ფანჯიკიძე.
