თურქეთის ტერიტორიაზე მდებარე ქართული ძეგლების - იშხანისა და ოშკის აღდგენის სამუშაო დოკუმენტი დიდი ხანია არსებობს, თუმცა კონკრეტული შეთანხმება ორ ქვეყანას შორის ამ საკითხთან მიმართებაში არ შემდგარა. ამის შესახებ საქართველოს საგარეო საქმეთა მინისტრის მოადგილემ ნინო კალანდაძემ დღეს გამართულ ტრადიციულ ბრიფინგზე განაცხადა.
მისი თქმით, წელიწადზე მეტია უკვე ორ სახელმწიფოს შორის ამ დოკუმენტზე მუშაობა მიმდინარეობს.
"რამდენიმე ვარიანტი შემუშავდა როგორც ქართულის, ისე თურქული მხარის მიერ. ეს ის საკითხია, რომელზეც შეთანხმება ჯერ არ შემდგარა, რადგან ჩვენ პოზიცია გაგვაჩნია, რომელსაც ჯერ-ჯერობით თურქული მხარე არ იზიარებს", - განაცხადა კალანდაძემ.
მისი თქმით,. ქართულ მხარეს განსაკუთრებული დაინტერესება აქვს ამ საკითხთან მიმართებაში.
"ქართული მხარე გრძნობს პასუხისმგებლობას კულტურული ძეგლების დაცვასთან მიმართებაში. ჩვენ ძალიან აქტიური და კონსტრუქციული თანამშრომლობა გვაქვს თურქულ მხარესთან და იმედი გვაქვს, რომ მალე კონსესუსსაც მივაღწევთ", - აღნიშნა მინისტრის მოადგილემ.
